Bolgarııalyq baıqaýshy saılaýdyń uıymdastyrylýyn joǵary baǵalady

NUR-SULTAN. QazAqparat - Bolgarııa Respýblıkasy Parlamentiniń depýtaty, halyqaralyq baıqaýshy Hamıd Hamıd saılaýdyń basty jeńimpazy Qazaqstan halqy bolady degen pikirin bildirdi, dep habarlaıdy QazAqparat tilshisi.

Ol bolgarııalyqtardyń bul saılaýǵa úlken qurammen kelgenin aıtady.

«Baıqaýshylardan bólek Ortalyq saılaý komıssııasynyń ókilderi, jýrnalıster de keldi. Keshe Ortalyq saılaý komıssııasynda birneshe kezdesý ótkizsek, búgin Nur-Sultan qalasyndaǵy birneshe ýchaskede boldyq. Eń bastysy, halyqtyń alańsyz daýys berýine zańnamalyq turǵydan da, uıymdastyrý turǵysynan da barlyq jaǵdaı jasalǵan. Barlyq kandıdattarǵa birdeı múmkindik berilgen dep aıtýǵa bolady. Saılaýdan alǵan áserime keler bolsaq, bul saılaýda kimniń jeńetinin biletin sııaqtymyn. Bul dodada Qazaqstan halqy jeńedi», - deıdi baıqaýshy.

Atalmysh elden kelgen taǵy bir baıqaýshy, Bolgarııa Respýblıkasy Syrtqy ister mınıstrliginiń saıası máseleler jónindegi bas dırektsııasynyń bas dırektory Petko Draganov Qazaqstandaǵy saılaýdy óz elindegi saıası naýqandarmen salystyrdy.

«Mundaǵy saılaýshylardyń belsendiligin erekshe atap ótý kerek. Bizde jýyqta Eýroparlament saılaýy ótti. Ondaǵy saılaýshylardyń belsendiligi men qazaqstandyqtardyń belsendiligin salystyrýǵa da kelmeıdi. Bizde qazir saılaý meılinshe adamnyń qatysynsyz, mashınanyń kómegimen júzege asady. Ol progress sizderge de kóp ýaqyt ótpeı jetedi dep úmittenemin», - deıdi Bolgarııa ókili.

Eske salsaq, Qazaqstandaǵy saılaýdy myńnan astam sheteldik baıqaýshy qadaǵalaýda.