Bolgarııalyq baıqaýshy Qazaqstandaǵy saılaýdyń joǵary standarttar boıynsha ótip jatqandyǵyn atap ótti

ASTANA. QazAqparat - Qazaqstandaǵy saılaýdyń joǵary standarttar boıynsha ótip jatyr. Bul týraly búgin QR Parlamenti Májilisin saılaý barysyn baqylaýǵa kelgen sheteldik delegattardyń baspasóz máslıxatynda bolgarııalyq baıqaýshy, Bolgarııanyń Óńirlik damý eks-mınıstri Desıslava Terzıeva málim etti.

«Daýys berý óte joǵary standarttarmen ótýde. Qazirgi ýaqytta saılaý barysy, bizdiń baqylaýymyzsha, birqalypty, tynysh júrip jatyr. Men daýys berýshilerdiń joǵary belsendiligine tańdanyp otyrmyn. Saılaý ýchaskelerinde jasy da kárisi de kóp. Bul óte úlken áser berdi. Bizde Bolgarııada mundaı belsendilik joq», - deıdi D.Terzıeva Astanada ótken brıfıngte.

Onyń sózi boıynsha, Qazaqstandaǵy saılaý ashyq jáne joǵary standarttar boıynsha ótýde.

«Men osy ýaqytqa deıin birde-bir shaǵym kórgen emespin. Men birneshe saılaý ýchaskesinde boldym jáne onda múmkindigi shekteýli azamattardyń kelip jatqandyǵy qatty qýantty. Bul joǵary demokratııalyqqa jatady», - dedi ol.

Aıta keteıik, QR Parlamenti Májilisiniń depýtattaryn saılaý barysyn baqylaýǵa 817 xalyqaralyq baıqaýshy men 147 sheteldik BAQ ókilderi kelip otyr.