Bolgarııadan Grekııaǵa ótken: eldegi orman úsh kúnnen beri órtenip jatyr
ASTANA. KAZINFORM — Bolgarııada bastalyp, shekara arqyly Grekııanyń Merıch prefektýrasyndaǵy Sofýlý aımaǵyna ótken orman órtin sóndirý jumystary úshinshi kún qatarynan jalǵasyp jatyr, dep habarlaıdy Anadoly.
Grekııalyq BAQ-tyń habarlaýynsha, órt Bolgarııanyń Ivaılovgrad mýnıtsıpalıtetine qaraıtyn Gorna-Lýkovo aýylynyń mańynda bastalyp, jeksenbi kúni shekaradan ótip, Grekııanyń Rýshenler jáne Kishi Derbent aýdandaryna jetken.
Órt qalyń orman alqabynyń birneshe jerinde áli de jalǵasyp jatyr. Jer bederiniń kúrdeliligine baılanysty órt sóndirý jumystaryna qatysyp jatqan jerdegi brıgadalar qıyndyqtarǵa tap bolyp otyr.
Grekııanyń Órt sóndirý qyzmetiniń málimetinshe, aımaqta 265 órt sóndirýshi, 12 jaıaý órt sóndirý brıgadasy jáne 59 arnaıy tehnıka jumyldyrylǵan.
Órtti sóndirýge ushaqtar men tikushaqtar da áýeden qoldaý kórsetip jatyr.
Tańerteń jeldiń báseńdeýine baılanysty órt odan ári taramady. Alaıda órtti áli tolyq baqylaýǵa alý múmkin bolmady.
Órt eldi mekenderden alys jerde bolyp jatyr, sondyqtan qazirgi ýaqytta aýyldarǵa qaýip tóngen joq.
Aıta keteıik, Túrkııanyń Egeı jáne Jerorta teńizi óńirlerinde orman órti qaýpi qyrkúıektiń sońyna deıin saqtaldy.
