Bolgarııadaǵy qazaqstandyq jasóspirimder janjaly nemen aıaqtaldy

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Bolgarııadaǵy qazaqstandyq jas fýtbolshylar daýy nemen aıaqtalǵanyn, elshiliktiń qandaı kómek kórsetkenin túsindirdi, dep habarlaıdy QazAqparat tilshisi.

Buǵan deıin áleýmettik jelide Bolgarııadaǵy fýtbol alańynda bolǵan janjal vıdeosy taraǵan edi.

«Bul - ádettegi, kez kelgen sporttyq match kezinde bolatyn janjal. Onda jasóspirimder chempıonaty bolǵan, bizdiń úsh-tórt jeke komandamyz barǵan. Olar Syrtqy ister mınıstrligine de, elshilikke de habar bermegen. Alaıda, bizdiń dıplomattar óz járdemin usyndy, oqıǵa ornyna jergilikti polıtsııa bardy. Ár tarap óz túsindirmelerin berdi. Bir-birine esh kinárat qoımaǵandyqtan, taraptar ózara ymyraǵa kelip, esh aryz jazylǵan joq», - dep túsindirdi A. Smadııarov mınıstrlikte ótken aptalyq brıfıngte.

Sonymen birge, resmı ókil jattyqtyrýshymen jáne ata-analarmen sóılesken, olar 26 tamyzda elge oraldy.

«Bizdiń Bolgarııadaǵy elshiligimiz tıisti jumys júrgizdi. Bolgarııa syrtqy ister mınıstrligine, sodan keıin qala polıtsııasyna mán-jaıdy anyqtaý jáne kinálilerdi jaýapqa tartý týraly ótinish jiberildi. Sondaı-aq, týrnır aıaqtalǵansha qazaqstandyq qatysýshylardyń qaýipsizdigin qamtamasyz etý týraly qala ákimshiligimen jáne jergilikti polıtsııamen ýaǵdalastyq jasaldy», - dedi Aıbek Smadııarov.