Bolgarııada túkti mamonttyń súıekteri tabyldy
ASTANA. KAZINFORM – Bolgarııada túkti mamonttyń súıek qaldyqtary tabyldy. Ǵalymdardyń aldyn ala baǵalaýynsha, súıekterdiń jasy birneshe myń jyldy quraıdy, dep habarlaıdy BELTA.
Mamonttyń súıekteri Dýnaı ózeniniń túbindegi ózen laıynyń astynda jaqsy saqtalǵan. Mamandar muny laı qabatyna otteginiń óte az túsýimen baılanystyrady.
Bıyl jazda Dýnaıdaǵy sý deńgeıi buryn-sońdy bolmaǵan deńgeıge deıin tómendegendikten, súıekter jer betine shyǵa bastaǵan.
– Aldyn ala baǵalaý boıynsha, bul túkti mamonttyń súıekteri. Bul janýar túri kezinde Eýropanyń basym bóligin mekendegen. Qazirgi ýaqytta tómengi jaq súıegi, azý tisteri, jaýyryn súıegi, qabyrǵalary jáne basqa da súıek bólikteri qazyp alyndy. Qańqanyń bir bóligi áli de jer astynda qalýy múmkin, – dedi Rýse óńirlik tarıhı mýzeıiniń tabıǵat bóliminiń kýratory Krasımır Kırov.
Ǵalymdardyń boljamynsha, mamonttyń bıiktigi shamamen 5 metr, salmaǵy 8 tonnadan asqan.
Zertteýshilerdiń pikirinshe, janýar osy aýmaqta buryn bolǵan batpaqqa batyp, qaza tapqan.
Aıta keteıik, buǵan deıin Argentınada buryn ǵylymǵa belgisiz bolǵan dınozavr túri anyqtaldy.
