Bolgarııada tanymal jýrnalıstiń jumystan shyǵarylýynyń sońy narazylyqqa ulasty

ASTANA. KAZINFORM — Bolgarııalyq bTV telearnasy tanymal jýrnalıst, tańǵy shoý júrgizýshisi Marııa Tsantsarovany jumystan shyǵarǵanyn málimdedi. Osy jańalyqty estigen halyq Sofııa kóshelerinde narazylyq sherýin uıymdastyrdy, dep habarlaıdy BTA.

Arna bul sheshimdi onyń efırdegi saıası beıtarapsyzdyǵy, basshysyna redaktsııalyq qysym jasaý jáne suhbattardy uzaqqa sozý arqyly efır kestesin buzý áreketimen túsindirdi. Bular kásibı standarttardy buzý dep baǵalanyp, Tsantsarovaǵa basqa praım-taım baǵdarlamalarda jetekshi ról usynylǵany aıtyldy.

Jumystan shyǵarylý týraly habardan keıin Sofııada narazylyq mıtıngileri ótti. Ótken jumada turǵyndar jýrnalısterge qoldaý kórsetý úshin AEJ-Bolgarııa uıymdastyrǵan aktsııada Marııa Tsantsarova men áriptesi Zlatımır Iochevti qorǵaý maqsatynda jınaldy. Dúısenbide AEJ-Bolgarııa «kofe ishý arqyly narazylyq kezdesýin» ótkizýdi jarııalady, qatysýshylardan saıası uransyz, kásibı turǵyda qoldaý kórsetý talap etildi.

Bul oqıǵa Bolgarııadaǵy BAQ erkindigine qatysty alańdaýshylyqty kórsetedi. Bıylǵy halyqaralyq mıssııa elde jýrnalısterge qysym kórsetilip, redaktsııalyq táýelsizdikke qaýip tóndirilip jáne SLAPP shaǵymdary arqyly qysym jasaý faktileri bolǵanyn atap ótti. Sondaı-aq Bolgarııa «Reportery bez granıts» uıymynyń BAQ erkindigi ındeksinde 59-orynnan 70-orynǵa tómendegen.

Eske sala ketsek, Premer-mınıstrdiń orynbasary — Mádenıet jáne aqparat mınıstri Aıda Balaeva elimizde eshqandaı jýrnalıstiń kásibı qyzmeti úshin qýdalaýǵa ushyramaıtynyn málimdedi.