Bolgarııada prezıdenttikke alǵash ret áıel saılandy
ASTANA. KAZINFORM — Qazirgi memleket basshysy Ilıana Iotova Bolgarııadaǵy prezıdenttik saılaýdyń ekinshi kezeńinde jeńiske jetip, el prezıdenti bolyp saılanǵan alǵashqy áıel atandy. Bul týraly Bolgarııa Ortalyq saılaý komıssııasynyń (OSK) qorytyndy derekterinde aıtylǵan.
Saılaý hattamalarynyń 100 paıyzy óńdelgennen keıingi qorytyndy boıynsha Ilııana Iotova men Kırıl Vlchevtiń kandıdatýrasyn saılaýshylardyń 57,57-57,6 paıyzy qoldaǵan. Olardyń qarsylastary — premer-mınıstrdiń burynǵy mindetin atqarýshy Andreı Gıýrov pen Georgı Kandev shamamen 39,5 paıyz daýys jınady. Al daýys berýshilerdiń 2,95 paıyzy «Eshqaısysyn qoldamaımyn» degen nusqany tańdaǵan.
Prezıdent saılaýynyń ekinshi kezeńi 1 qarashada ótti. Óıtkeni 25 qazandaǵy birinshi kezeńde kandıdattardyń eshqaısysy basym daýys jınaı almady. Ol kezde Ilııana Iotova 34,76 paıyz, al Andreı Gıýrov 31,95 paıyz daýys alǵan edi. Ekinshi kezeńde saılaýshylardyń belsendiligi tómen bolyp, daýys berýge olardyń shamamen 29 paıyzy qatysty.
Buǵan deıin vıtse-prezıdent qyzmetin atqarǵan Iotova 2026 jylǵy qańtardan beri memleket basshysynyń mindetin ýaqytsha atqaryp keldi. Buǵan prezıdent Rýmen Radevtiń parlament saılaýynda «Progressıvti Bolgarııa» partııasyn basqarý úshin otstavkaǵa ketýi sebep bolǵan. Iotovany bıliktegi partııa men premer-mınıstr Radev qoldady. Al Gıýrov batysshyl oppozıtsııalyq kúshterge súıendi.
Eýropalyq BAQ-tyń habarlaýynsha, Iotovanyń jeńisi qazirgi úkimettiń saıası ustanymyn nyǵaıta tústi. Jańa prezıdent 2027 jylǵy qańtarda qyzmetine kirisedi.
Eske salaıyq, buǵan deıin Serbııada parlament saılaýynyń qorytyndy nátıjesi shyqqanyn habarlaǵanbyz.
