Bolgarııada prezıdent saılaýynyń ekinshi týry búgin ótedi
ASTANA. KAZINFORM — Bolgarııa azamattary jeksenbi, 1 qarashada prezıdent saılaýynyń ekinshi týrynda daýys beredi, dep habarlaıdy Anadolu agenttigi.
25 qazanda ótken saılaýdyń birinshi týrynda qatysqan 27 úmitkerdiń ishinde eń kóp daýys jınaǵan eki jup kandıdat bes jyldyq merzimge prezıdent jáne vıtse-prezıdent laýazymdaryn ıelený quqyǵy úshin baq synaıdy.
Saılaýshylar qazirgi prezıdent Ilııana Iotova men vıtse-prezıdenttikke kandıdat Kırıl Vylchev, sondaı-aq burynǵy premer-mınıstr Andreı Gıýrov pen vıtse-prezıdenttikke kandıdat Georgıı Kandev arasynda tańdaý jasaıdy.
Daýys berý tańǵy saǵat 7:00-de bastalyp, 20:00-de aıaqtalady. Eger saılaý ýchaskelerinde saılaýshylar kezekte tursa, daýys berý ýaqyty uzartylýy múmkin, biraq keshki saǵat 21:00-ge deıin bitedi.
Sonymen qatar sheteldegi saılaý ýchaskelerinde daýys berý jergilikti ýaqyt boıynsha tańǵy saǵat 7:00-den saǵat 20:00-ge deıin ótedi. Qajet bolǵan jaǵdaıda ýaqytty 21:00-ge deıin uzartý múmkindigi bar.
Birinshi týrda 6 584 025 tirkelgen saılaýshynyń 22,98%-y qatysqan kezde, Iotova-Vylchev juby 528 951 daýys nemese 34,76% jınady.
Gıýrov pen Kandev 486 232 daýys nemese 31,95% jınap, ekinshi týrǵa ótti.
Sonymen qatar birinshi týrda tirkelgen saılaýshylardyń 4,42%-y «Men eshkimdi qoldamaımyn» nusqasyn tańdaǵan.
Bolgarııadaǵy aldyńǵy prezıdent saılaýy 2021 jyldyń 14 qarashasynda ótti, ekinshi týr sol jyldyń 21 qarashasynda boldy.