Bolgarııada merziminen buryn parlament saılaýy ótedi
ASTANA. KAZINFORM – Bolgarııada Halyq jınalysy 52-shaqyrylymy depýtattarynyń merziminen buryn saılaýy ótedi. El aýmaǵyndaǵy 12 myńnan astam saılaý ýchaskesi tańǵy saǵat 07:00-de ashylyp, 20:00-ge deıin jumys isteıdi, dep habarlaıdy TASS agenttigi.
Saılaýshylar tizimine 6,5 mıllıonnan astam adam engizilgen. El ishindegi ýchaskelerden bólek, daýys berý álemniń 55 elinde de ótedi. Azamattar arnaıy daýys berý mashınalary arqyly nemese qaǵaz bıýlletendermen daýys bere alady.
Parlamenttegi 240 orynǵa 14 saıası partııa men 10 koalıtsııa ókilderi úmitker. Ortalyq saılaý komıssııasynyń málimetinshe, depýtattyq mandattar úshin 4 786 kandıdat kúresip jatyr.
Senbi kúni barlyq saılaý ýchaskeleri tekserilip, saılaý barysynyń tynysh ótýin qamtamasyz etý úshin polıtsııa men jandarmerııanyń baqylaýyna alynǵan.
Basymdyq jolyndaǵy kúres
Sońǵy áleýmettik zertteýlerge sáıkes, bes saıası birlestik parlamentke ótýge múmkindik alyp otyr, alaıda taǵy tórt saıası bloktyń 4 paıyzdyq mejeden ótý múmkindigi bar.
Saılaýaldy naýqan bastalǵannan beri «Progressıvti Bolgarııa» koalıtsııasy kósh bastap keledi. Ol eldegi olıgarhııalyq basqarý modelin ózgertýge, ulttyq múddeni basymdyq etýge, daýly máselelerdi soǵys arqyly emes, dıplomatııalyq jolmen sheshýge baǵyttalǵan. Koalıtsııany 2017–2026 jyldary respýblıka prezıdenti bolǵan Rýmen Radev basqarady. Koalıtsııa jańa parlamentte kópshilik orynǵa ıe bolýdy maqsat etip otyr. Alaıda sarapshylar mundaı nátıje ekitalaı ekenin aıtady. Soǵan qaramastan, saýalnamaǵa qatysqandardyń shamamen 34 paıyzy osy koalıtsııaǵa daýys berýge daıyn.
«Bolgarııanyń eýropalyq damýy úshin azamattar» partııasy men Demokratııalyq kúshter odaǵynyń blogyn, ıaǵnı EO men NATO saıasatyn qoldaıtyn kúshti saılaýshylardyń shamamen 18 paıyzy qoldaıdy.
Qalǵan oryndar úshin «Ózgeristi jalǵastyramyz» partııasy men «Demokratııalyq Bolgarııa» koalıtsııasy, «Quqyqtar men bostandyqtar qozǵalysy», sondaı-aq ulttyq múddeni qorǵap, Reseıge qarsy sanktsııalardy alyp tastaýdy qoldaıtyn «Vozrojdenıe» partııasy kúresip jatyr.
«Bolgarııa sotsıalıstik partııasy – Birikken solshyldar» koalıtsııasy, «Velıchıe», «MECh» jáne «Sııanıe» partııalarynyń da parlamentke ótý múmkindigi bar. Olar tabysqa jetken jaǵdaıda jeńiske jetken tarapty qoldaýǵa daıyn.
Saılaýshylardyń belsendiligi rekordtyq deńgeıde bolýy múmkin. Daýys berýge shamamen 3,3 mıllıon adam qatysady dep kútilip otyr.
Adal daýys berý
Saılaýaldy naýqan barysynda eldiń túrli óńirlerinde, ásirese tabysy tómen aımaqtarda, saılaýshylardyń daýysyn satyp alýǵa qarsy baǵyttalǵan aýqymdy polıtsııa operatsııalary júrgizildi.
Saılaý zańnamasyn buzý derekteri boıynsha ondaǵan qylmystyq is qozǵalyp, 1 mıllıon eýrodan astam qarajat tárkilendi. Polıtsııa málimetinshe, bir saılaýshynyń daýysy 50-den 100 eýroǵa deıin baǵalanǵan. Sonymen qatar olarǵa áleýmettik qyzmetter, azyq-túlik jıyntyqtary jáne basqa da osyndaı «jeńildikter» usynylǵan.
Turaqty bılik
El halqynyń basym bóligi saılaý qorytyndysy boıynsha jańa turaqty kópshilik pen úkimettiń qurylǵanyn qalaıdy. Sarapshylardyń pikirinshe, bul maqsatqa jetý saılaýshylar belsendiligine baılanysty.
Parlamentte kóp jyldan beri jumys istep kele jatqan dástúrli saıası kúshter ózderiniń turaqty elektoratyna súıene alady. Al «Progressıvti Bolgarııa» sııaqty jańa saıası kúshtiń paıda bolýy eldegi saıası jaǵdaıǵa eleýli ózgeris ákelýi múmkin.
Buǵan deıin Bolgarııa prezıdenti Rýmen Radev elde sońǵy bes jylda segizinshi ret merziminen buryn saılaý ótetinin málimdegen edi. Bul birneshe partııanyń jańa úkimet qurýdan bas tartýyna baılanysty bolǵan.
Sondaı-aq Bolgarııanyń eks-prezıdenti parlamenttik saılaýǵa qatysatynyn rastady.
