Bolgarııada bes jyl ishinde segizinshi ret parlament saılaýy ótip jatyr
ASTANA. KAZINFORM — Jeksenbi kúni bolgarlar bes jyl ishinde segizinshi ret saılaý ýchaskelerine bardy, dep habarlaıdy Euronews.
Boljamdarǵa sáıkes, bul joly jeńis sybaılas jemqorlyqqa qarsy ustanymymen tanylǵan burynǵy prezıdent Rýmen Radevtiń blogyna buıyrýy múmkin.
Euronews málimetinshe, Eýroodaqtaǵy eń kedeı memleket sanalatyn Bolgarııa 2021 jyldan beri úkimetterdiń jıi aýysý kezeńin bastan keship keledi. Buǵan jappaı sybaılas jemqorlyqqa qarsy narazylyqtar sebep bolyp, uzaq jyl eldi basqarǵan konservatıvti kóshbasshy Boıko Borısovtyń bıligine núkte qoıǵan.
Eýrostat derekterine sáıkes, Bolgarııa jan basyna shaqqandaǵy JІÓ boıynsha EO elderi arasynda turaqty túrde sońǵy orynda tur. 2025 jyly el (Grekııamen qatar) EO ortasha kórsetkishiniń 68%-y deńgeıinde bolǵan.
Radev toǵyz jyl boıy 6,5 mıllıon halqy bar balqan eliniń prezıdenti qyzmetin atqardy.
Qańtar aıynda ol jańadan qurylǵan solshyl-ortalyq «Progressıvti Bolgarııa» birlestigin basqarý úshin qyzmetinen ketti. Saılaý aldyndaǵy saýalnamalar bul blokqa shamamen 35% daýys beriletinin kórsetken.
Áýe kúshteriniń burynǵy generaly eldi «olıgarhııalyq basqarý modelinen» aryltýdy maqsat etetinin aıtyp, 2025 jyldyń sońyndaǵy sońǵy úkimettiń qulaýyna ákelgen antıkorrýptsııalyq narazylyqtardy qoldady.
Saýalnamalar saılaýshylar belsendiliginiń artýyn boljap otyr: Bolgar telegraf agenttiginiń málimetinshe, 3,3 mıllıonnan astam adam daýys beredi dep kútiledi.
Daýys berý Grınvıch ýaqyty boıynsha 17:00–de aıaqtalyp, birden ekzıt-pol nátıjeleri jarııalanady. Al aldyn ala qorytyndylar dúısenbi kúni belgili bolady.
Saýalnamalarǵa qaraǵanda, Borısovtyń eýropashyl GERB partııasy shamamen 20% daýys jınap, lıberaldy PP-DB blogynan ozyp, ekinshi oryn alýy múmkin.
Kósh bastap turǵan Radev EO-nyń «jasyl» energetıkalyq saıasatyn «erejesiz álemdegi ańǵal saıasat» dep synǵa alady.
Jalpy Radev 240 oryndyq parlamentte absolıýtti kópshilikke ıe bolýǵa úmittenip otyr.
Degenmen, saıasatqa degen senimsizdik buǵan deıin saılaýshylar belsendiligin tómendetken: 2024 jylǵy saılaýda ol 39%-ǵa deıin túsken.
Alaıda, sarapshylardyń pikirinshe, Radevtiń saılaýshylardy jumyldyra alýyna baılanysty bul joly belsendilik joǵary bolady.
Sońǵy aptalarda polıtsııa saılaýshylardy satyp alýǵa qarsy reıdter barysynda 1 mıllıon eýrodan astam qarajat tárkilegen. Júzdegen adam, onyń ishinde jergilikti depýtattar men ákimder ustaldy.
Osydan buryn Bolgarııada ýaqytsha úkimet resmı túrde jumysyn bastaǵanyn jazǵanbyz.
