Bolgarııada Astana kóshesi ashyldy

SOFIıA. QazAqparat - Astananyń 20 jyldyq mereıtoıyna oraı Sofııada «Astana» kóshesiniń ashylýyna arnalǵan saltanatty is-shara ótti. Bul týraly QazAqparat SІM baspasóz qyzmetine silteme jasap habarlaıdy.

Іs-sharaǵa Bolgarııa Syrtqy ister mınıstrliginiń ókilderi, «Qazaqstanmen dostyq úshin» parlamenttik tobynyń múshesi - depýtat Borıs ıAnchev, Sofııa qalasy meriniń orynbasary Doncho Barbalov, Sofııa oblysynyń meri Ilıan Todorov, Qalalyq Maslıhat keńesshisi Sımeon Slavchev, Qazaqstan Ulttyq fýtbol qurama komandasynyń jattyqtyrýshysy Stanımır Stoılov, bokstan álem chempıony Kýbrat Pýlev, dıplomatııalyq korpýs, Bolgarııanyń isker, ǵylymı, sarapshlyq toptarynyń jáne BAQ-tar jáne qazaq dıasporanyń ókilderi qatysty.

Іs-shara barysynda QR Bolgarııadaǵy dıplomatııalyq mıssııasynyń basshysy Temirtaı Іzbastın Astana qalasynyń damý tarıhy týraly jan-jaqty aıtyp berdi. Óz kezeginde, Sofııa qalasy meriniń orynbasary D.Barbalov «Astana» kóshesi Sofııanyń eń ádemi oryndarynyń birinde ornalasqandyǵyn atap ótti.

Shara aıasynda belgili Bolgar kompozıtory men ánshisi Orlın Goranovtyń oryndaýynda «Astana» atty áni shyrqaldy.

Atap keterlik jaıt, «Astana» kóshesi Sofııa ortalyǵynda «Bolgarııa» dańǵylynyń qasynda ornalasqan.