Bolgarııada 1 aqpanda eldiń eks-prezıdenti Jelıý Jelevtiń qaıtys bolýyna baılanysty aza tutý kúni jarııalandy
ASTANA. QazAqparat - Bolgarııa Úkimeti jeksenbi kúni 1 aqpanda Bolgarııanyń tuńǵysh demokratııalyq jolmen saılanǵan prezıdenti (1990 jyldan 1997 jylǵa deıin) Jelıý Jelevtiń qaıtys bolýyna baılanysty ulttyq aza tutý kúni dep jarııalady. Ol 30 qańtarda 79 jasynda dúnıeden ótti.
Mınıstrler kabıneti Jelıý Jelevti jerleýdi uıymdastyrý jónindegi úkimettik komıssııa qurdy, oǵan Bolgarııanyń burynǵy prezıdentteri Petr Stoıanov (1997 - 2002) jáne Georgı Pyrvanov (2002 - 2012) kirdi, komıssııaǵa vıtse-premer Rýmıana Bychvarova basshylyq etýde.
«Óziniń ómirmen jáne isimen doktor Jelıý Jelev biz búginde jyljyp kele jatqan jolymyzǵa baǵyt berdi. Memleket te, halyq ta bolgarlar úshin birden bir múmkin jol - eýropalyq úlgidegi demokratııa qurylysy jolymen senimmen qadam basyp keledi», - dep atap ótti respýblıka prezıdenti Rosen Plevnelıev kóńil aıtý jedelhatynda.
Jelıý Jelev 1935 jyly 3 naýryzda týǵan. 1958 jyly Sofııa ýnıversıtetin fılosofııa mamandyǵy boıynsha bitirdi, 1988 jyly doktorlyq dıssertatsııasyn qorǵady.
Prezıdent qyzmetine Jelıý Jelev 1990 jyly 1 tamyzda Respýblıkanyń jańa Konstıtýtsııasy qabyldanǵannan keıin birneshe aptadan soń Bolgarııa Halyqtyq jınalysynda (parlamentinde) saılandy. 1992 jyly ol alǵashqy tikeleı prezıdent saılaýynda jeńiske jetip, bes jyl boıy memleket basshysy boldy.
Bolgarııa Halyqtyq jınalysy eldiń tuńǵysh prezıdentin bir mınýt únsizdikpen eske túsirdi.
