Bolgarııa vıtse-prezıdenti Pavlodar oblysynda dıaspora ókilderimen kezdesti
PAVLODAR. QazAqparat – Pavlodar oblysynyń ákimi Bolat Baqaýov Bolgarııa vıtse-prezıdenti Ilııana Iotovamen kezdesti, dep habarlaıdy QazAqparat aımaq ákimdigine silteme jasap.
Qos tarap Pavlodar oblysy men Bolgarııa Respýblıkasy arasyndaǵy seriktestik jaıyn talqylady.
Ilııana Iotova Pavlodardaǵy bolgar dıasporasynyń ókilderimen kezdesýge arnaıy kelgen. Búginde Pavlodarda osy ulttyń 1 myńǵa jýyq ókili turady. Sapar barysynda Bolgarııa vıtse-prezıdenti Pavlodar oblysynyń ákimimen de kezdesti.
«Búginde bizdiń óńirde júzden astam ult ókili tatý-tátti ǵumyr keship otyr. Jer aýdarylǵan alǵashqy bolgarlar qazirgi Pavlodar oblysynyń aýmaǵyna 1907-1908 jyldary kelgen. Olar qazirgi Aqtoǵaı aýdanynda qurylǵan Razýmovka jáne Andrııanovka aýyldaryna turaqtap, eldi mekenderdiń damýyna tyń serpin berdi. Bolgarlar bir ǵasyrdan astam ýaqyt boıy oblystyń áleýmettik jáne ekonomıkalyq damýyna mol úles qosyp keledi. Olar óńir tarıhynyń, mádenıetiniń ajyramas bir bóligine aınaldy. Pavlodardaǵy «Slavıane» bolgar ulttyq-mádenı ortalyǵy Qazaqstannyń úkimettik emes sektorynyń tolyqqandy múshesine, óńirdegi birlik pen tatýlyqtyń úlgisine aınalǵan ujym», – dedi Bolat Baqaýov kezdesýde.
Aımaq basshysy Pavlodar oblysy men Bolgarııa Respýblıkasynyń arasynda uzaqmerzimdi jańa baılanystar ornatylatynyna senim bildirdi. Sondaı-aq eki jaqty baılanystyń tamyr jaıýyna barynsha atsalysatynyn jetkizdi. Óz kezeginde Ilııana Iotova jyly qarsy alyp, bolgar dıasporasyn qoldap otyrǵan pavlodarlyqtarǵa rızashylyǵyn bildirdi.
