Bolgarııa týrnıri: qazaqstandyq boksshylar enshisinde - bes kúmis júlde
Osymen jetpisinshi márte uıymdastyrylǵan baıyrǵy jarysqa negizgi quramda qatysqan Qazaqstannan bes boksshy fınalǵa shyqty.
Sońǵy básekege bes birdeı boksshy joldama alǵanymen, qazaqstandyqtardy joly bola qoıǵan joq. Aldymen qolynyń jaraqatyna baılanysty Abylaıhan Júsipov (69 kg) rıngke shyǵa almady. Jeńis qarsylasy, ózbekstandyq Bobo-Ýsmon Botýrovqa berildi.
Fınalda 2013 jylǵy Azııa chempıony Temirtas Júsipov 49 kg salmaqta 2018 jylǵy Azııa oıyndarynyń jeńimpazy, úndistandyq Amıt Pangaldan aılasyn asyra almady. Tóreshiler biraýyzdan A.Pangal utty dep tapty.
Taǵy bir tájirıbeli boksshy, 2015 jylǵy Azııa birinshiliginiń kúmis júldegeri Zákir Safıýllın 60 kg salmaqta reseılik Artýr Sýbhankýlovpen kezdesti. Bul joly da 4:1 esebimen jeńis reseılik boksshynyń ýysynda ketti.
Eresekter arasyndaǵy dodaǵa qosylǵanyna kóp bola qoımaǵan jas boksshy Sanatáli Tóltaev 64 kg salmaqta Reseı chempıony Alekseı Mazýrmen sharshy alańǵa shyqty. Obaly ne kerek, Sanatáli alǵa umtylyp, baryn saldy. Áıtse de sál basymdylyqpen (3:2) reseılik boksshynyń qoly kóterildi.
Qazaqstannyń sońǵy úmiti, Rıo Olımpıadasynyń kúmis júldegeri Vasılıı Levıt taǵy bir reseılik Sadam Magomedovpen altyn júldege talasty. Alaıda jeńis taǵy da qazaqstandyq boksshyǵa buıyrǵan joq. Bul jolǵy esep 4:1 -S.Magomedovtiń paıdasynda.
Qazaqstannan bes, Reseı men Ózbekstannan tórt boksshydan fınalǵa joldama alǵanymen, altyn medal jóninen otandastarymyz olardan qalyp qoıdy.
Ótken jylǵy osy týrnırden qazaqstandyq boksshylar 1 altyn, 4 qola júldemen qaıtqan edi.
Eske sala keteıik, budan buryn qazaqstandyq bes boksshynyń jartylaı fınalǵa shyqqanyn, sodan keıin olardyń altyn júlde úshin talasatynyn, al Abylaıhan Júsipovtiń jaraqatyna baılanysty kúmispen shektelgenin jazǵan bolatynbyz.