Bolgarııa Pýtın ushaǵyna áýe dálizin berýge daıyn

ASTANA.KAZINFORM — Bolgarııa AQSh prezıdenti Donald Tramppen kezdesý úshin Býdapeshtke bara jatqan Reseı prezıdenti Vladımır Pýtınniń ushaǵyna áýe keńistigin berýge daıyn, dep habarlaıdy TASS. 

Bul týraly Bolgarııanyń Syrtqy ister mınıstri Georg Georgıev Bolgarııa ulttyq radıosynan málimdedi.

— Beıbitshilikke qol jetkizý úshin kúsh-jiger jumsalyp jatqanda, osy maqsatqa jetý úshin barlyq qajetti jaǵdaıdy jasaý qısyndy, — dedi eldiń Syrtqy ister mınıstri.

 Áýe dálizin berý múmkindigi týraly da oıyn aıtty.

— Eger oǵan qatysýshylardyń biri kele almaı qalsa, jınalys qalaı ótedi? — dedi ol áýe dálizin berý múmkindigi týraly kelesi suraqqa jaýap bere otyryp.

Esterińizge sala keteıik, 16 qazanda Tramp Pýtınmen telefon arqyly sóıleskennen keıin Býdapeshtte kezdesýge keliskenderin málimdegen. Reseı prezıdentiniń kómekshisi ıÝrıı Ýshakov ta Máskeý men Vashıngtonnyń Vengrııa astanasynda ótetin eki kóshbasshynyń jańa kezdesýine daıyndyqty «kidirissiz» bastaıtynyn málimdedi.

Ýkraına prezıdenti Vladımır Zelenskıı NBC News arnasyna bergen eksklıýzıvti suhbatynda Donald Tramp pen Vladımır Pýtınniń Býdapeshttegi kezdesýine qosylýǵa daıyn ekenin rastap, «ádil jáne uzaq beıbitshilik» tek janjalǵa qatysýshy barlyq taraptyń qatysýymen ǵana múmkin bolatynyn aıtty.

Zelenskııdiń bastamasy AQSh Memlekettik hatshysy Marko Rýbıony qosa alǵanda, joǵary laýazymdy keńesshilerdiń kezdesýimen bastalatyn Ýkraına boıynsha kelissózderdiń ekinshi raýndyna daıyndyq týraly habarlamalar tusynda kóterildi.