Bolgarııa kelesi jyldan bastap eýroǵa kóshýdi josparlap otyr
ASTANA. KAZINFORM — Bul sheshim Eýropalyq komıssııa men Eýropalyq ortalyq bank Bolgarııanyń barlyq qajetti krıterııge sáıkes keletinin rastaǵannan keıin qabyldandy, dep habarlaıdy Kazinform tilshisi.
Sársenbi kúni Brıýssel Bolgarııanyń eýroaımaqqa qosylý jónindegi kópjyldyq ótinishin resmı túrde maquldady. Bul elge 2026 jylǵy 1 qańtarda eýroaımaqtyń 21-shi múshesi bolýǵa jol ashady.
Eýropalyq komıssııa men Eýropalyq ortalyq bank Bolgarııanyń valıýta odaǵyna qosylý úshin qajetti «konvergentsııa krıterıılerine» saı keletinin málimdedi.
— Eýro bolgar azamattary men bıznesi úshin naqty paıda ákeledi: baǵanyń turaqtylyǵy, tómen tranzaktsııalyq shyǵyndar, jınaqtardyń qorǵalýy, ınvestıtsııalardyń artýy jáne saýdanyń ósýi. Árıne, eýro — jaı ǵana valıýta emes, — dedi Eýrokomıssııanyń ekonomıka jónindegi komıssary Valdıs Dombrovskıs.
Sofııa eýroǵa kóshý jolynda bıýdjet tapshylyǵy men memlekettik qaryzdy tómen deńgeıde ustap keldi, sondaı-aq Ýkraınadaǵy oqıǵalarǵa baılanysty energetıkalyq daǵdarystan keıin turaqty túrde joǵary bolyp turǵan ınflıatsııany tejep ustaýǵa tyrysty.
Komıssııanyń sońǵy boljamy boıynsha, Bolgarııadaǵy jalpy ınflıatsııa deńgeıi bıyl 3,6%-ǵa jetedi dep kútilip otyr, bul eýroaımaqtyń ortasha kórsetkishi — 2,4%-dan edáýir joǵary.
Degenmen, Brıýssel Bolgarııada 2024 jylǵy mamyrdan 2025 jylǵy sáýirge deıingi kezeńdegi ınflıatsııa deńgeıi orta eseppen 2,7%-dy quraǵanyn atap ótti. Bul — eń álsiz ınflıatsııa baıqalǵan eýroaımaq elderiniń ortasha kórsetkishine 1,5 paıyzdyq pýnkt qosý arqyly esepteletin 2,8%-dyq «baqylaý máninen» tómen.
Sondaı-aq Brıýssel 2026 jyly Bolgarııadaǵy ınflıatsııa 1,8%-ǵa deıin tómendeıdi dep boljady. Bul — jyldyń basynda engizilgen nan men meıramhanalarǵa qatysty QQS-tyń qalpyna keltirý sharasynyń áseri toqtaǵannan keıin jáne jalaqy ósimi baıaýlaǵan jaǵdaıda múmkin bolady.
Bolgarııa valıýtasy lev 1999 jyldan beri eýroǵa baılanǵan, biraq eldiń qazirgi ýaqytta Eýropalyq ortalyq banktiń aqsha-nesıe saıasatyna daýys berý quqyǵy joq.
Brıýsseldiń bul málimdemesi eldegi ondaǵan qalada ótken jappaı narazylyqtarǵa qaramastan jasaldy. Kóptegen azamat valıýta aýystyrý baǵanyń, ásirese azyq-túlik baǵasynyń kúrt ósýine alyp keledi dep alańdady.
Narazylyq aktsııalaryn Bolgarııadaǵy úshinshi iri saıası kúsh sanalatyn ońshyl radıkaldy «Qaıta órleý» partııasy jáne el Prezıdenti Rýmen Radev qoldady. Eki tarap ta eldiń eýroaımaqqa kirýi týraly referendým ótkizýdi usynǵan bolatyn, biraq bul bastama parlament pen sottar tarapynan toqtatyldy.
Eýroǵa resmı túrde ótý úshin sońǵy sheshimdi EO-nyń qarjy mınıstrleri 2025 jylǵy 8 shildede qabyldaıdy dep kútiledi. Eger ol maquldansa, Bolgarııa eýroǵa kóshý protsesin jalǵastyrady.
Sonymen qatar, 8–9 maýsym kúnderi Memleket basshysy Qasym-Jomart Toqaevtyń shaqyrýymen Bolgarııa Prezıdenti Rýmen Radev Qazaqstanǵa resmı saparmen keledi dep josparlanǵan.