Bolgarııa Qazaqstannyń Eýropadaǵy iri ári óte mańyzdy seriktesi - Prezıdent
ASTANA. KAZINFORM – Bolgarııa men Qazaqstan arasynda iskerlik keńesi qurylady. Bul týraly Aqordada elimizge resmı saparmen kelgen Bolgarııa Prezıdenti Rýmen Radevpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Qazaqstan Bolgarııamen ózara tıimdi seriktestikti ilgeriletýge beıildi ekenin rastaǵymyz keledi. Sizdiń elińizdi Qazaqstannyń Eýropadaǵy iri ári óte mańyzdy seriktesi retinde qarastyramyz. Óz tarapymyzdan qazir ǵana talqyǵa salynǵan birqatar saladaǵy qarym-qatynasymyzdy tereńdetý, nyǵaıtý úshin barlyq múmkindikti ustanamyz. Biz úlken mańyzǵa ıe ári erekshe nazardy talap etetin belgili bir salalardy talqyǵa saldyq. Bolashaqta yntymaqtastyǵymyzdy ilgeriletýde úlken nátıjelerge qol jetkizetindigimizge senimdimin, - dedi Prezıdent.
Memleket basshysy eki el de aýyl sharýashylyǵy, týrızm, densaýlyq saqtaý, tsıfrlandyrý syndy salalardy qosa alǵanda saýda-sattyq qarym-qatynasyn nyǵaıtýǵa múddeli ekenin basa aıtty.
- Qazaqstan ekonomıkalyq qatynastardy odan ary nyǵaıtýǵa, energetıka, aýyl sharýashylyǵy, densaýlyq saqtaý jáne týrızm salalarynda ınvestıtsııalyq jobalardy iske asyrýǵa umtylady. Saýda-ekonomıkalyq qatynas jónindegi úkimetaralyq komıssııa bul jumystyń aldyńǵy qatarynda bolaryna senimdimin. Sondaı-aq Bolgarııa men Qazaqstan arasynda iskerlik keńes qurýǵa nıettimiz jáne taıaý bolashaqta ol iskerlik qarym-qatynasymyzy nyǵaıtýdaǵy kelesi qadam bolmaq. Búgingi bıznes forým men saýda palatalarymyz arasyndaǵy ózara túsinistik týraly memorandýmǵa qol qoıý yntymaqtastyǵymyzǵa úles qosaryna senimdimiz, - dedi Qasym-Jomart Toqaev.
Prezıdent Qazaqstan men Bolgarııa BUU jáne ózge de halyqaralyq uıymdar aıasynda jemisti yntymaqtastyqty jolǵa qoıǵanyn, álemdik arenada ortaq maqsattary bar ekenin atap ótti.
Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Bolgarııa Prezıdenti Rýmen Radevti qarsy alǵanyn jazǵan edik.