Bolgarııa depýtattary Aqtóbedegi terrorıstik aktige baılanysty kóńil aıtty
ASTANA. QazAqparat - Búgin Parlament Májilisine Bolgarııa Respýblıkasy Halyqtyq jıynynyń Densaýlyq saqtaý jónindegi komıssııa tóraıymy, Qazaqstan parlamentimen dostastyq tobynyń jetekshisi Danıela Darıtkova bastaǵan delegatsııa keldi. Delegatsııany Májilistiń Áleýmettik-mádenı damý komıtetiniń tóraıymy Gúlnár Yqsanova qabyldady.
Delegatsııa tarapy áńgimeni Qazaqstanda jarııalanǵan qaraly kúnge, sonymen qatar, Aqtóbedegi terraktige baılanysty qaıǵyly oqıǵaǵa kóńil aıtýdan bastady. Budan bólek, Bolgarııa depýtattarymen bolǵan júzdesýde terorızmge qarsy kúreste birlesken kúsh-jigerdiń qajettiligi atap ótildi. Osy rette kezdesý barysynda QR Prezıdenti N. Nazarbaevtyń Vashıngton sammıtindegi «Álem. HHІ ǵasyr» manıfesiniń ózektiligine nazar aýdardy. «Jańa týyndap jatqan qaterlermen kúres týraly áńgimede biz elder arasyndaǵy yntymaqtastyqtyń halyqtar ıgiligine jumys isteýi kerektigin eshqashan esten shyǵarmaýǵa tıispiz», - dedi Danıela Darıtkova.
Óz kezeginde Májilis depýtaty Gúlnár Yqsanova eki el arasyndaǵy yntymaqtastyqtyń barlyq baǵytyn damytý boıynsha talqylaýlarǵa ázir ekenin jetkizdi. Osyǵan baılanysty taraptar densaýlyq saqtaý, medıtsına, demografııa máselelerine kóńil bóle otyryp, áleýmettik damý baǵytyndaǵy yntymaqtastyqqa nazar aýdardy. «Qazaqstan «Nurly jol» strategııasyn júzege asyrý barysynda eýropalyq elderdiń ınvestıtsııalyq múmkindikterin keńinen paıdalanýǵa qyzyǵýshylyq tanytady. Sonymen qatar, Bolgarııany Astanada ótetin «EKSPO-2017» halyqaralyq mamandandyrylǵan kórmesinebelsendi túrde qatysýǵa shaqyrǵym keledi», - dedi Gúlnár Yqsanova.
