Bolgarııa azamaty qazaqstandyq alaıaqtarǵa 102 mıllıon teńgeden astam aqsha aýdarǵan

PAVLODAR. KAZINFORM – Aqmola oblysynda jumys istep júrgen Bolgarııa azamaty iri ınternet-alaıaqtyqtyń qurbanyna aınaldy. Bul týraly Kazinform agenttiginiń tilshisi Pavlodar oblystyq polıtsııa departamentiniń baspasóz qyzmetine silteme jasap habarlaıdy.

Vedomstvo málimetinshe, bıylǵy mamyr-maýsym aılarynda belgisiz bireýler ózderin bank qyzmetkerleri retinde tanystyryp, sheteldik azamatty aldap soqqan. Olarǵa senip qalǵan jábirlenýshi úshinshi tulǵalardyń shottaryna 102 mıllıon teńgeden astam qarajat aýdarǵan.

— Jábirlenýshiniń polıtsııaǵa shaǵymdanýyna baılanysty CyberPol bólimshesiniń qyzmetkerleri qylmystyq is qozǵap, jedel-izdestirý is-sharalaryn júrgizdi. Zamanaýı tsıfrlyq tehnologııalardy paıdalana otyryp, kıberpolıtseıler alaıaqtyq toptyń uıymdastyrýshylary men dropperleriniń izine tústi, — dep habarlady departament.

Nátıjesinde Pavlodar oblysynyń eki turǵyny jáne alaıaqtyq shemasyna qatysy bar taǵy tórt adam anyqtalyp, olardyń naqty róli men qylmysqa qatysy tergelip jatyr.

Tergeý barysynda bul tulǵalardyń Kókshetaý qalasy men Qorǵaljyn aýdanynda oryn alǵan taǵy eki alaıaqtyq deregine qatysy bolýy múmkin ekeni belgili boldy.

— Qazirgi tańda bul aqparat tekserilýde. Sonymen qatar, jedel ýákilder qylmystyq toptyń basqa da qurbandaryn anyqtap jatyr. Tergeý ýaqytynda kúdiktiler ýaqytsha ustaý ızolıatoryna qamaldy. Tintý kezinde dálel retinde mobıldi telefondar men qarajattyń bir bóligi tárkilendi, — delingen polıtsııanyń málimdemesinde.

Eske salaıyq, buǵan deıin Pavlodarda «TAKORP» qarjy pıramıdasyn uıymdastyrǵandarǵa sot úkimi kesilgen edi.