Bolǵan ana kesenesinen tabylǵan qundy jádiger Ulttyq mýzeı qoryna berildi
ASTANA. KAZINFORM – Álkeı Marǵulan atyndaǵy Pavlodar pedagogıkalyq ýnıversıteti Ulttyq mýzeıge biregeı tarıhı qundylyq — Altyn Orda dáýirine jatatyn saltanatty áıel halatyn resmı túrde tapsyrdy.
Bul sırek kezdesetin artefakt Bolǵan ana kesenesin qazý jumystary barysynda tabylǵan. Atalǵan kesene nysanyn qazaqstandyq arheolog Aıbar Qasenalı zerttegen. Tabylǵan qundy jádiger 2019 jyly ýnıversıtet qoryna qabyldanǵan bolatyn.
Birneshe jyl boıy Arheologııalyq zertteýler ınstıtýtynyń «UMAI» mádenı murany konservatsııalaý jáne restavratsııalaý halyqaralyq zerthanasynyń mamandary biregeı toqyma buıymdy jan-jaqty zertteý, konservatsııalaý jáne uzaq merzimdi saqtaý baǵytynda keshendi ǵylymı jumystar júrgizdi. Bul jádiger Joshy Ulysy elıtasyna tıesili mádenı qabatpen baılanysty asa qundy tarıhı derek retinde qarastyrylady.
Zertteý jumystary arheolog-restavrator Tetıana Krýpanyń jetekshiligimen júzege asyryldy. Ǵalymdar halattyń tehnologııalyq erekshelikterin tereń taldap, onyń daıyndalý ádisteri men qoldanylǵan materıaldaryn ǵylymı turǵyda zerdeledi. Nátıjesinde artefaktiniń dálme-dál ǵylymı rekonstrýktsııa-kóshirmesi jasalyp, túpnusqany saqtaý maqsatynda tolyq konservatsııalyq sharalar kesheni oryndaldy. Búginde bul rekonstrýktsııa Ulytaý mýzeıiniń ekspozıtsııasynda mańyzdy oryn alyp otyr.
Bolǵan ana kesenesinen tabylǵan tekti áıelge tıesili halattyń ǵylymı rekonstrýktsııasy Astanada 19-20 mamyr kúnderi Qazaqstan Respýblıkasy Prezıdentiniń qatysýymen ótken «Altyn Orda — dala órkenıetiniń modeli: tarıh, arheologııa, mádenıet, biregeılik» atty halyqaralyq sımpozıým aıasynda negizgi eksponattardyń biri retinde usynyldy.
Halyqaralyq forýmǵa qatysqan otandyq jáne sheteldik ǵalymdar men sarapshylar pavlodarlyq zertteýshilerdiń atqarǵan jumysyn joǵary baǵalap, onyń ǵylymı jáne mádenı mańyzdylyǵyn erekshe atap ótti.
Aıta ketelik tarıh ǵylymdarynyń doktory Maqsat Alpysbes qazaq handyǵynyń memlekettik bastaýy Joshy ulysynan bastalatynyn álemge dáleldeýimiz kerek degen oı aıtqan edi.
