Bolaı taýyndaǵy órt temeki tuqylynan shyqqan bolýy múmkin
ALMATY. QazAqparat – 22 sáýirde Almatyda Bolaı taýy otqa oranǵan bolatyn. Órt temeki tuqylynan shyqqan bolýy múmkin. Bul týraly qalalyq TJD basshysy Serik Áýbákirov brıfıng barysynda aıtty, dep habarlaıdy QazAqparat tilshisi.
Eske salaıyq, Medeý aýdanynda Bolaı taýy (Mohnatka) órtenip, tilsiz jaý 1 gektar aýmaqty sharpyǵan.
«Qazir karantın ýaqyty. Adamdardyń kóbi úıinde jatyr. Taýǵa shyǵyp demalatyndardyń sany azaıǵan. Desekte, taý joldarymen júretin adamdar bar. Keshe Bolaı taýyndaǵy órtti sóndirgenen keıin, mamandar onyń qaıdan tutanǵanyn anyqtaýǵa kiristi. Aldyn ala boljam boıynsha órt temeki tuqylanan shyǵýy múmkin»,- deıdi Serik Áýbákirov.
Onyń aıtýynsha, kinálini anyqtaý óte qıyn. Óıtkeni bul jolmen qansha adam júrgeni belgisiz.
Sonymen qatar, Tótenshe jaǵdaılar departamentiniń bastyǵy qurǵaq shópti órtegenderdi qatań jazalaý kerektigin aıtty.
«Búgingi tańda 100 aılyq eseptik kórsetkishke deıin (200 myń teńgeden joǵary) aıyppul salý jaýapkershiligi qarastyrylǵan. Biraq men bul adamdar órtti sóndirýge ketken shyǵyndy óteýi kerek dep sanaımyn, bul resýrstyq jumys. Tehnıkalyq resýrstar jumsalady, órt úlken aýmaqqa taralady, keıde biz tipti tikushaqtardy áýege kóteremiz. Ókinishke oraı, biz bul mehanızmdi jalǵan qońyraý shalǵandarǵa ǵana qoldanamyz», – dedi departament basshysy.
