«Bolattan 10 ese myqty»: Qytaı álemdegi eń berik kómirtekti talshyqty jasady

ASTANA. KAZINFORM — Qytaıda sársenbi kúni T1200 sanatyna jatatyn otandyq sýperberik kómirtekti talshyq SYT80 tanystyryldy. Bul eldiń osyndaı kómirtekti talshyqtardy óndirý tehnologııasyndaǵy úlken ilgerileýin bildiredi, dep habarlaıdy Sınhýa.

Óndirýshi kompanııa China National Building Material Group Co., Ltd. (CNBM) málimetinshe, jańa materıaldyń jyldyq óndiristik qýaty qazir júzdegen tonna deńgeıine jetip, Qytaıdy osyndaı sanattaǵy talshyqty jappaı shyǵara alatyn alǵashqy elge aınaldyrdy.

CNBM basqarma tóraǵasy Chjoý ıÝısıanniń aıtýynsha, bul iri jetistik Qytaıdyń joǵary tıimdi kómirtekti talshyqtardy óndirýdiń tolyq óndiristik tizbegin — tehnologııadan bastap jabdyqqa, zerthanalyq synaqtan jappaı óndirisine deıin — táýelsiz meńgergenin kórsetedi.

Kompanııa habarlaǵandaı, SYT80 kómirtekti talshyq álemdik qaýymǵa Parıjdegi JEC World kompozıttik materıaldar kórmesinde de tanystyryldy.

Jańa kómirtekti talshyqtyń dıametri adam shashynyń dıametrinen 10 ese juqa, biraq sozylýǵa beriktigi kádimgi bolattan 10 ese joǵary, al tyǵyzdyǵy bolattyń tyǵyzdyǵynyń tórtten birin ǵana quraıdy. Materıal joǵary jyldamdyqtaǵy temirjol, kommertsııalyq ǵarysh tehnologııalary, jańa energııa kózderi, adam tárizdi robottar, medıtsınalyq jabdyqtar jáne sport salasynda keńinen qoldanyla alady.

Osydan buryn Qytaı 2026 jyly jalpy ishki ónimniń ósimi 4,5–5% bolady dep boljaıtynyn jazǵanbyz.