Bolatbek Orazbaev «Altyn dombyra» tóńiregindegi daýǵa núkte qoıdy
ASTANA. QazAqparat - Aqyn Bolatbek Orazbaev «Altyn dombyra» tóńiregindegi daýǵa baılanysty pikirin bildirip, áleýmettik jeli qoldanýshylaryn sabyrǵa shaqyrdy.
«Beker daýryǵa bermeıik. Júgirgen jetpeıdi, buıyrǵan ketpeıdi. Kimge neniń qaıyrly ekenin Alla bizden jaqsyraq biledi. Muhtardyń ónerin, óleńin, adamgershiligin, azamattylyǵyn ózim úlken sahnaǵa shyqpaı turǵanda da talaı kórgenmin. Qazaq aıtysynyń órkendep, ósýine birden-bir úles qosqan jigitterdiń biri dep esepteımin. Osy jolǵy aıtysqa tórelik jasaǵan ádil qazylar alqasyna da esh ókpem joq. Kórermender de óz unatqan aqyny jeńiske jetkenin, júldeli bolǵanyn qalaıdy. Ol zańdy. Júldeni Muhtar aldy eken dep onyń tarapyna jáne ádil qazylardyń tarapyna jaǵymsyz pikir aıtpaǵandaryńyzdy qalaımyn»,-dep jazady ol óziniń Feısbýk jelisindegi jeke paraqshasynda.
Sonymen birge ol «Altyn dombyrany» jeńip alǵan áriptesine qoldaý bildirip, aqyndardy bereke-birlikke shaqyrdy.
«Báıgeni Muhtar alsa, ol ózimniń dosym, baýyrym. Birinshi oryn jaman oryn dep kim aıtty? Sondyqtan az ǵana dúnıege bola Muhtar dosyma degen kóńilim kirlemeıdi. Esh aınymaǵan qalpynda, taza kúıinde qala beredi. Eń bastysy halyq bizdiń kishkentaı ǵana ónerimizge oń baǵasyn berip jatsa, mine altyn dombyra degen sol!!! Muhtar dosymdy jáne júldeli oryn alǵan barlyq baýyrlarymdy shyn júrekten quttyqtaımyn! Alla berekeli qylsyn!»,-deıdi aqyn Bolatbek Orazbaev.
Eske sala keteıik, Almatyda el Táýelsizdiginiń 25 jyldyǵyna arnalǵan «Altyn dombyra» respýblıkalyq aqyndar aıtysynda Muhtar Nııazov Gran-prı ıegeri atanyp, «Altyn dombyrany» qanjyǵalaǵan . Atalmysh aıtys áleýmettik jelide qyzý talqylanyp, bas júldege Bolatbek Orazbaev laıyq dep shý kótergen bolatyn.
