Bolatbek Najmetdınuly: Qarapaıym adamdardyń múddesin qorǵaýymyz kerek
Búgin Májilistiń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady, dep habarlaıdy Kazinform.
Zań jobasy boıynsha baıandama jasaǵan Májilis depýtaty Bolatbek Najmetdınuly qujat kásipkerlik qyzmetti jaqsartý maqsatymen ázirlengenip atap ótti.
«Jumys tobynyń zań jobasymen jumys isteýi barysynda depýtattar kásipkerlik qyzmetti júrgizý jaǵdaılaryn jaqsartýǵa, memlekettik baqylaý júıesin retke keltirýge, olardy júrgizýdiń ashyqtyǵyn arttyrýǵa baǵyttalǵan túzetýler engizdi», – dedi depýtat.
Bolatbek Najmetdınulynyń aıtýynsha, saýda bazarlaryn jańǵyrtý merzimderin uzartý, ıaǵnı merzimdi 2023 jylǵy 1 qańtardan 2026 jylǵy 1 qańtarǵa deıin aýystyrý usynylady. Bul zań aldynda eki ret uzartylǵan. Bul másele boıynsha tutynýshylar men saýda núktelerinde jumys isteıtin qarapaıym adamdardyń múddelerin qorǵaý jóninde depýtattar arasynda qyzý talqylaý ótken.
«Osy qolaısyz jaǵdaıdyń týyndaǵany - memlekettik organdar men ýákiletti jáne jergilikti atqarýshy organdardyń óz jumysyna nemquraılyqpen qaraǵandyǵynyń kórsetkishi», – dedi Najmetdınuly.
Sonymen qatar depýtat merzimderdiń uzartylýyna baılanysty aǵymdaǵy jyldyń birinshi jartyjyldyǵynda saýda bazarlaryn jańǵyrtý boıynsha Májilistiń arnaıy otyrysyn ótkizýdi surady.
«Budan basqa, Memleket basshysynyń Qazaqstan halqyna 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Joldaýynda aıtylǵan tapsyrmalaryn iske asyrý sheńberinde kásipkerlik qyzmetti basynan bastap jańadan retteýdi endirýge baǵyttalǵan túzetýler engizildi. olar ákimshilik kedergiler men artyq talaptardy qysqartýdy kózdeıdi», – dedi depýtat.
Zań jobasy boıynsha 1680 túzetý kelip tústi, olar elý otyrysta, onyń ishinde jumys tobynyń qyryq bes otyrysynda jáne Komıtettiń bes keńeıtilgen otyrysynda qaraldy.
Aıta ketý kerek, zań jobasy 2023 jyldyń 8 qarashasynda birinshi oqylymda maquldandy.
