Bolat Jumabekov Ulytaý oblysy ákiminiń orynbasary bolyp taǵaıyndaldy
ULYTAÝ. KAZINFORM - Óńir basshylyǵynda kadrlyq ózgerister boldy. Oblys ákiminiń jańa orynbasary qyzmetine aýyl sharýashylyǵy, jer qatynastary jáne memlekettik qyzmet salalarynda tájirıbesi bar basqarýshy taǵaıyndaldy.
Bolat Jumabekov 1972 jyly týǵan. Aqmola aýyl sharýashylyǵy ınstıtýtyn jáne Manash Qozybaev atyndaǵy Soltústik Qazaqstan memlekettik ýnıversıtetin támamdaǵan. Qazaqstan Prezıdenti janyndaǵy Memlekettik basqarý akademııasynyń magıstri dárejesine ıe.
Eńbek jolyn 1997 jyly Soltústik Qazaqstan oblysy Tımırıazev aýdany ákiminiń apparatynda bas maman qyzmetinen bastaǵan.
1999–2005 jyldary Soltústik Qazaqstan oblystyq Jer resýrstaryn basqarý komıteti fılıalynda túrli laýazymdar atqardy. 2005–2009 jyldary Tımırıazev aýdanynyń Aýyl sharýashylyǵy jáne jer qatynastary bólimin basqardy. Keıin aýdan ákimi bolyp taǵaıyndaldy.
2009–2012 jyldary Soltústik Qazaqstan oblysy ákiminiń apparat jetekshisi, odan keıin óńir ákiminiń orynbasary qyzmetterin atqardy.
2012–2022 jyldar aralyǵynda Soltústik Qazaqstan oblysynda basshylyq qyzmetterde jumys istedi. Petropavl qalasynyń, sondaı-aq Qyzyljar aýdany men Ǵabıt Músirepov atyndaǵy aýdan ákimi boldy.
2022–2024 jyldary kommertsııalyq sektorda eńbek etti. 2024 jyldan bastap qazirgi taǵaıyndaýǵa deıin Aýyl sharýashylyǵy mınıstrligine qarasty «QazAgroEkspert» AQ basqarma tóraǵasy qyzmetin atqardy.
Jańa qyzmetinde Bolat Jumabekov aýyl sharýashylyǵy jáne jer qatynastary, tabıǵı resýrstar jáne tabıǵatty paıdalanýdy retteý máselelerine, sondaı-aq Ulytaý oblysynyń veterınarııa basqarmasynyń jumysyna jetekshilik etedi.
Almaz Ydyrysov Ulytaý oblysy ákiminiń birinshi orynbasary bolyp taǵaıyndalǵanyn jazǵan bolatynbyz.
