Bolat Jámishev: Beıbitshilik jáne kelisim saraıynyń alleıasynda taqtaıshalar ǵana qalǵan

ASTANA. KAZINFORM – «Samuryq-Qazyna» qorynyń qoǵamdyq keńesiniń tóraǵasy Bolat Jámishev «Samruk-Kazyna Trust» qorynyń jumysyn talqylaýǵa arnalǵan otyrysta Aral tabanyna sekseýil egý jobasyn synady.

- Aral tabanyna aǵash egýge qatysty aıtarym bar. Bul jobanyń mańyzy zor ekeni anyq. Biraq soǵan bálenshe mıllıon aǵash egý kerek degen tapsyrma retinde emes, túpkilikti nátıjesi bolatyn joba retinde qarasańyzdar degen ótinish. Túpkilikti nátıje degen – Aral tabanynyń qandaı da bir bóliginiń ormanǵa aınalýy. Egilgen aǵashtyń bári jersinip kete qoımas. Bul tipti keń aýqymdaǵy eksperıment shyǵar. Bul iske túpkilikti nátıjesi bolatyn joba retinde qarasańyzdar, naqty monıtorıng qalyptastyrǵan bolar edińizder. Táýekelderdi aldyn ala kórip, saldaryn báseńdetý kerektigin biler edińizder. Sol arqyly Araldyń qańsyp qalǵan tabanyn túgel ormanǵa aınaldyrý múmkin be, álde bir bóligin ǵana ormanǵa aınaldyrý kerek pe degen suraqtyń jaýaby tabylar edi. Osyndaı tásil bolý kerek sııaqty, - dedi ol.

Bolat Jámishev júıeli tásildiń bolmaýy qandaı táýekelge ákeletinin Astananyń mysalymen túsindirdi.

- Bul iste júıeli tásil kerek. Aǵashtyń sany jumystyń tıimdiligine kepildik bola almaıdy. Mysaly, men «Pıramıdanyń» (Astanadaǵy «Beıbitshilik jáne kelisim saraıy – red) mańaıynda turamyn. Sol pıramıdanyń aýlasyna qadalǵan beınetaqtanyń túr-túri samsap tur. «Bálenshe degen adam túgenshe oqıǵanyń qurmetine ekti» dep turatyn jazýdan kóz súrinedi. Biraq aǵash joq. Al belgitaqtalar qalqaıyp tur. Qazir kúrdeli jóndeý jasap, taqtaıshalardy da julyp jatyr. Ol jaqta turyp jatqanyma 12 jyl boldy. Qanshama delegatsııa baryp, aǵash ekti?! Belgitaqtalar ádemi-aq. Biraq ony alleıa dep aıtýǵa kele me, bilmedim. Sondyqtan sizderge de Aral tabanynan aǵash egýdiń nátıjesin baǵalaý tásilin ózgertý kerek, - dedi qoǵamdyq keńes tóraǵasy.

Aıta keteıik, «Samuryq-Qazynaǵa» qańtardyń sońyna deıin úsh qalada JEO salý máselesin sheshý mindetteldi.