Bolat Jámishev: Astana mańynda 600-den astam qoldanylmaı otyrǵan jer ýchaskeleri bar
ASTANA. 26 jeltoqsan. QazAqparat - Jer ýchaskelerin túgendeý kezinde jalpy kólemi 14,4 myń gektarǵa teń 645 jer ýchaskesi anyqtaldy. Bul týraly búgin Astanada Ortalyq kommýnıkatsııalar qyzmetinde ótken brıfıngte QR Óńirlik damý mınıstri Bolat Jámishev málim etti.
Onyń málimetteri boıynsha, osynyń ishinde 203 aýylsharýashylyq (12,7 myń ga), 442 - kommertsııalyq nysandardy (1,7 myń ga) salýǵa arnalǵan jerler.
«Memlekettik menshikke jalpy kólemi 6,9 myń ga bolatyn 188 jer ýchaskesi qaıtaryldy. Sotta 2,9 myń ga-ǵa teń taǵy 58 ýchaskeni memleketke qaıtarý týraly aryzdar qaralyp jatyr», - dep atap ótti mınıstr.
Onyń habarlaýynsha, atalmysh baǵyttaǵy jumystar keleshekte qarqyndy túrde atqaryla bermek.
«Quqyqtyq sıpattaǵy keıbir qıyndyqtar bar. Degenmen Parlament qabyrǵasynda talqylanyp jatqan jer qatynastary týraly zań jobasy qabyldansa, bul jumystardyń tıimdiligi arta túsedi», - dep túıdi ol.
