Bolat Tilepov ÚEU-lardyń jumysyndaǵy basym baǵyttardy atady
«El-jurtymyzdyń turmysyn jaqsartyp, ómir sapasyn kóterý isinde azamattyq kúshterdiń úlesi de, salmaǵy da erekshe. Al endi ómir sapasy degenimizdiń ózi jınaqtap aıtqanda árbir otbasynyń molshylyq pen berekeli turmysy, myqty densaýlyǵy, balalarynyń sapaly bilim men jaqsy tálim-tárbıesi, qaýipsizdigi men qolaıly qorshaǵan ortasy. Bul rette árıne, birqatar basym, mańyzdy baǵytqa bergen durys. Bizdiń oıymyzsha, birinshiden - bilim berýdiń sapasyn arttyrý men tárbıe isin jetildirý. Aıtalyq, mektep jasyndaǵy balalardyń arasynda salaýatty ómir saltyn nasıhattaý, tán men jan saýlyǵyn qamtamasyz etý, kásiptik baǵyt berý, olardyń bıik rýhanı kelbetin qalyptastyrý jáne taǵy da basqa kóptegen taqyryp qoǵamdyq uıymdar úshin erekshe den qoıyp, maqsatty sharalar júrgizetin dúnıeler», - dedi Bolat Tilepov «Táýelsizdiktiń 30 jyldyǵyn ótkizýdegi azamattyq sektordyń róli» taqyrybynda ótken kezdesý barysynda.
Vıtse-mınıstrdiń aıtýynsha, ekinshiden, densaýlyq saqtaý men medıtsınalyq qyzmettiń sapasyn arttyrý baǵyty boıynsha onyń qoljetimdiligin arttyrý, medıtsınalyq saqtandyrý máselesin nasıhattaý, jalpy pandemııa sııaqty qoǵamdyq indetterge qarsy turý, túrli psıhologııalyq keńes berý ortalyqtarynyń jumysyn uıymdastyrý taqyrybyndaǵy jobalar ózekti.
«Úshinshiden, halqymyzdyń salaýatty ómirin jappaı jaqsartý isinde tán saýlyǵy tek sport, dene shynyqtyrý ǵana emes, rýhanı ómirdiń tazalyǵy, til men din, mádenıet pen ádebıet, salt pen dástúr máseleleri alǵa shyǵady. Árıne, bul jalpy máseleler. Desek te, bul jumystyń qaı-qaısysyn alsań da nátıjesin ózderińiz sııaqty kózi ashyq, kókiregi oıý, bilimi keń, biligi mol azamattar men uıymdarsyz kózge elestetý múmkin emes», - dedi ol.
