Bolat Tilepov sybaılas jemqorlyqqa qarsy aqparattyq túsindirý sharalaryn aıtty
«Jalpy, sybaılas jemqorlyqqa qarsy is-qımyl - ol barlyq memlekettik organdarǵa ortaq mindet. Osy baǵytta bizdiń mınıstrlikte bul jumystarǵa úlken basymdyq berilgen. Birinshiden, mınıstrlik jetekshilik etetin salalarda sybaılas jemqorlyqqa qarsy standarttardy bekitken bolatynbyz, ıaǵnı vedomstvoǵa kelgen árbir jańa qyzmetker osy standarttarmen tanysyp, ondaǵy qaǵıdattardy oryndaýǵa mindetteledi. Budan bólek, mınıstrliktiń jáne onyń tıisti qurylymdary jumysyna qatysty jemqorlyqqa qarsy jospar jasalyp, bekitildi. Bul jospar aqparattyq túsindirýden bastap, jalpy quqyqtyq yqpal etý sharalaryn qamtyp otyr», - dedi vıtse mınıstr áleýmettik jelidegi anticorruption.kz paraqshasynda ótken talqylaýda.
Sonymen qatar B. Tilepov mınıstrliktiń qatysýymen «Adaldyq alańy» jobalyq keńsesi jumysyn jalǵastyryp jatqanyn eske saldy.
«Osy joba aıasynda úlken nátıjelerge qol jetkizilip jatyr. Budan bólek, mınıstrlik jumysyna sybaılas jemqorlyqqa qarsy monıtorıngilerdi keńinen júrgizýdemiz. Aqparat jáne qoǵamdyq damý mınıstrligi bolǵandyqtan, bul jumystarǵa qoǵam ókilderin, qoǵamdyq uıymdardy keńinen tartýǵa tyrysamyz. Bul turǵyda bizde seriktestik negizdegi jumys jolǵa qoıylǵan», - dedi ol.
«Jalpy, osy saladaǵy nátıjelerdiń biri – mınıstrlik jumysynyń ashyqtyǵy. Ashyqtyq prıntsıpin keńinen qoldanyp kelemiz. Barlyq talqylaý jumystary onlaın formatta ótip jatyr. Osy rette, mınıstrdiń bastamasymen turaqty jumys isteıtin «dóńgelek ústel» otyrysy (onlaın rejımde) uıymdastyrylyp otyr. Bul talqylaýlarǵa qoǵamdyq belsendiler ózekti máselelerdi, sonyń ishinde vedomstvoǵa qatysty taqyryptardy ashyq qarastyrady», - dedi Bolat Tilepov.
Onyń aıtýynsha, sybaılas jemqorlyqqa qarsy kúres tek qana memlekettik organdardyń kúshimen sheshilmeıdi. Osy oraıda qoǵamnyń belsendi músheleri retinde úkimettik emes uıymdardyń kómegi zor.
