Bolat shyǵaratyn jańa zaýyt iske qosylsa, 2,5 myńnan astam adam jumyspen qamtylmaq
TARAZ. KAZINFORM — Jambyl oblysyndaǵy Jibek Joly arnaıy ekonomıkalyq aımaǵynda tolyq óndiristik tsıkldi metallýrgııa kombınatynyń qurylysy boıynsha iri ınvestıtsııalyq joba iske asyrylyp jatyr. Bul týraly Úkimettiń baspasóz qyzmeti málim etti.
Investor — Fujian Hengwang Investment Co., Ltd. qytaı kompanııasy.
Qazirgi ýaqytta ınvestıtsııa boıynsha kelisim jasalyp, bólingen jer ýchaskelerin qurylys-montaj jumystaryna daıyndaý belsendi júrgizilip jatyr. Indýstrııalyq aımaqqa temirjol, elektr jelileri jáne tabıǵı gaz syndy qajetti ınfraqurylym tartylǵan.
— Qurylys kezeńinde 1,5 myń ýaqytsha jumys orny ashylyp, zaýyt iske qosylǵannan keıin 2,5 myńnan astam adam turaqty jumyspen qamtylmaq. Investor kompanııa jumys kúshiniń keminde 90%-yn jergilikti turǵyndardan alýdy kózdep otyr, — delingen habarlamada.
Jobany júzege asyrý eki kezeńge: 2025 jyldan 2029 jylǵa deıin josparlanǵan. Zaýytty paıdalanýǵa berý 2027 jylǵa belgilense, odan keıingi eki jyl ishinde óndiristik qýattylyqty keńeıtý jumystary júrgiziledi. Jalpy ınvestıtsııa kólemi — $756 mln. Jańa kásiporyn temir kenin zamanaýı sýtekti tehnologııamen óńdep, jylyna 3 mln tonnaǵa deıin ónim shyǵarýǵa qaýqarly bolady.
Bul elimizdegi sýtek negizindegi shahta peshin paıdalanatyn alǵashqy metallýrgııalyq keshen bolmaq. Joba salanyń «jasyl» transformatsııasy talaptaryna tolyq saı keledi.
«Fujian Hengwang Investment Co., Ltd» basqarma tóraǵasynyń orynbasary Lı Chjýndýn zaýyt tolyq qýatyna shyqqan soń, onyń ónimi ishki naryqtaǵy bolat tapshylyǵyn ótep qana qoımaı, Ortalyq Azııa, Ýkraına men Eýropa elderine eksportqa baǵyttalatynyn aıtty.
— Qurylys aıaqtalǵannan keıin, bizdiń ónim Qazaqstan naryǵyndaǵy bolat tapshylyǵyn tolyqtaı jaba alady. Іshki suranysty qanaǵattandyra otyryp, biz sonymen qatar kórshiles elderge de ónim jetkizý arqyly Qazaqstan ekonomıkasynyń jáne eksporttyq áleýetiniń damýyna úles qosa alamyz. Joba iske qosylǵan soń, ol tek óndiris salasynyń emes, sonymen qatar logıstıka, ken ıgerý, tipti týrızm men qoǵamdyq tamaqtaný sekildi ilespe salalardyń da damýyna serpin beredi, — dep atap ótti ol.
Sonymen qatar jobany iske asyrý óńirdiń áleýmettik-ekonomıkalyq damýyna oń áserin tıgizedi. Qabyldanǵan mindettemeler sheńberinde Fujian Hengwang Shý qalasynda turǵyn úı keshenderin salady, sondaı-aq aýmaqtardy kógaldandyrý, balabaqshalar men qalalyq saıabaqtar salýdy qosa alǵanda, áleýmettik bastamalardy turaqty negizde qoldaıtyn bolady.
Fujian Hengwang Investment Co., Ltd. búginde QHR-daǵy úsh metallýrgııalyq kásiporyndy basqaratyn jáne jylyna 23 mln tonnaǵa deıin bolat óndirisiniń jalpy kólemin baqylaıtyn ónerkásiptik óndiristegi eń iri álemdik kóshbasshy bolyp sanalady. Jobalarǵa ınvestıtsııalardyń jalpy kólemi $6 mlrd-tan asady. Qazaqstanda enshiles qurylym — AEA qatysýshysy mártebesin alǵan «Yonggang Central Asia Iron and Steel» JShS tirkelgen.
Premer-mınıstr Oljas Bektenov osy jyldyń sáýir aıynda Jambyl oblysyna sapary barysynda Jibek Joly AEA aýmaǵynda jańa aýqymdy ınvestıtsııalyq jobalardyń iske asyrylýymen tanysqan bolatyn.
Buǵan deıin habarlanǵandaı, qaıtarylǵan aktıvter esebinen Jambyl oblysynda 5 aýyz sý nysanynyń qurylysyna qarjy bólingen edi.