Bolat Ótemuratov Qazaqstan tennıs federatsııasynyń prezıdenti bolyp qaıta saılandy
Bolat Ótemuratov Qazaqstan tennıs federatsııasynyń prezıdenti bolyp qaıta saılandy, dep habarlaıdy Kazinform.
Astana qalasynda Qazaqstan tennıs federatsııasynyń jyl saıynǵy konferentsııasy ótti.
Konferentsııa delegattary, federatsııa fılıaldarynyń ókilderi Bolat Ótemuratovty taıaýdaǵy 4 jylǵa Qazaqstan tennısi uıymynyń basshysy etip saılady.
Qazaqstan tennıs federatsııasynan málim etkendeı, Bolat Ótemuratov 2007 jyldan beri uıymǵa jetekshilik etip keledi.
Kúni búgin elde 48 qazirgi zamanǵy tennıs ortalyqtary bolsa, ondaǵy 364 korttyń basym bóligi — jabyq korttar.
30 myńdaı bala tennıspen aınalyssa, sonyń 3 500-i tegin jattyǵady, olar qajetti kıimmen qamtylyp, ulttyq jáne halyqaralyq týrnırlerge qatysý úshin federatsııadan qarjylaı qoldaý alady.
Osy jyldar ishinde federatsııa balalarmen jumys isteıtin 300 bapker jáne 500 nusqaýshyny daıyndap shyǵardy. Ulttyq jarystarmen (jylyna 200-deı) qatar 2020 jyldan beri Qazaqstanda ATP 250 týrnırleri ótip keledi.
2022 jyly jarys deńgeıi bir márte ATR 500-ge deıin kóterildi.
Qazaqstandyq jasóspirimderdiń tabystary erekshe qýantady. Jýyrda 16 jasqa deıingiler arasynda Qazaqstannyń bozbalalar men qyzdar quramalary komandalyq álem chempıonatynda óner kórsetti.
Ótken jyly 14 jasqa deıingiler arasynda Qazaqstan quramasy álem chempıonatynda úzdik tórt komandanyń qataryna kirdi.
Al 2023 jyldyń qorytyndysy boıynsha jasóspirimder arasynda ITF reıtıngisinde TOP-100-ge eki qazaqstandyq tennısshi endi.
Ámir Omarhanov — 57, Asyljan Arystanbekova 66-orynda tur.
Halyqaralyq tennıs federatsııasynyń baǵalaýy boıynsha 2021 jyly-aq Qazaqstan tennıstiń damýy jóninen álemdegi 20 úzdik eldiń qataryna kirdi.
Bul rette oıynshylar men salynǵan korttar sany jáne ulttyq quramanyń olımpıadalardaǵy, Devıs kýbogi men Bıllı Djın Kıng kýbogindegi tabystary sekildi krıterııler esepteldi.
Sonymen qatar Halyqaralyq tennıs federatsııasynyń (ITF) dırektorlar keńesi Malagada ótken uıymnyń resmı jınalysy barysynda tórt vıtse-prezıdentti 2023 jyldan 2027 jylǵa deıingi merzimge biraýyzdan qaıtadan saılady.
Osy jıynda Bolat Ótemuratov vıtse-prezıdent bolyp qaıta saılandy. Bul qyzmetti ol 2019-2023 jyldary atqaryp kelgen edi.
Oǵan Braıan Heınlaın (AQSh), Salma Mýelı Gýızanı (Týnıs) jáne Rafael Ýestrýpp (Brazılııa) qosyldy.
