Bolat Ótemuratov Halyqaralyq tennıs federatsııasy dırektorlar keńesiniń múshesi bolyp saılandy
ASTANA. QazAqparat - Chılıdiń Santıago qalasynda Halyqaralyq tennıs federatsııasynyń (ITF) prezıdenti men federatsııanyń dırektorlar keńesiniń múshelerin saılaý ótti. ITF dırektorlar keńesiniń músheligine tórt jylǵa 25 kandıdattyń ishinen Qazaqstan tennıs federatsııasynyń prezıdenti Bolat Ótemuratov saılandy.
ITF dırektorlarynyń jańa quramyna túrli elderdiń 13 kandıdaty kirdi.
Halyqaralyq federatsııanyń basshysy bolyp amerıkalyq Devıd Heggertı saılanǵanyn atap óteıik. Ol ITF-ti buǵan deıin 16 jyl boıy basqarǵan Franchesko Rıchchı-Bıttıdiń ornyna keldi.
Halyqaralyq tennıs federatsııasy (aǵyl. International Tennis Federation, ITF) - álemdik tennıstiń basqarýshy qurylymy. Búginde ol 205 ulttyq uıymdy biriktirip otyr. Ol oıynnyń erejelerin shyǵaryp, ózgertedi, tennısti Halyqaralyq Olımpıada komıtetine (HOK) usynady, birqatar jarystar ótkizip, sondaı-aq álemde tennısti damytý jáne tanymaldylyǵyn arttyrýmen aınalysady.
