Bolat Majaǵulov sot úkimimen kelispeı, ózin aqtaýdy surady

ASTANA. KAZINFORM – 8 jyl 6 aıǵa sottalǵan Astana qalasy Mádenıet basqarmasynyń burynǵy basshysy Bolat Majaǵulov sot úkimimen kelispeı, ózin aqtaýdy surady. Bul týraly elorda sotynyń baspasóz qyzmeti habarlaıdy.

- Sottalǵandardyń advokattary sot úkimimen kelispeı apellıatsııalyq shaǵym túsirdi. Shaǵymda B.Majaǵulovty aqtaýdy, qurylys kompanııasynyń basshysy Mádı Qanafınge qatysty bas bostandyǵynan aıyrýǵa baılanysty emes jaza taǵaıyndaýdy surady. Apellıatsııalyq satymen sot úkimi ózgerissiz qaldyryldy, - delingen sot taratqan habarlamada.

Aqparatta aıtylǵandaı, sottalǵandardyń kinási kýágerlerdiń aıǵaqtarymen, taýartaný zertteýiniń qorytyndylarymen, mamanmen, sarapshymen, aýdıtor, sondaı-aq jasyryn tergeý áreketteriniń materıaldarymen rastaldy.

Sot aktisi zańdy kúshine endi.

Aıta keteıik, Astana qalasynyń Mádenıet basqarmasynyń burynǵy basshysy Bolat Majaǵulovqa sot úkimi bıyl qańtarda shyqty, osylaısha eks-sheneýnik 8,5 jylǵa sottaldy. 

Eske salaıyq, Bolat Majaǵulov 2024 jyly qyrkúıekte ustaldy. 

Qarjylyq monıtorıng agenttigi Astana qalasynyń Mádenıet basqarmasynyń burynǵy basshysy men merdiger uıym ókilderine qatysty asa iri kólemde bıýdjet qarajatyn (1 mlrd teńge) jymqyrý kúdigine ilikkenin habarlady.

Urlanǵan qarajattyń kólemi 1 mlrd teńgeden asyp otyr. Kúdikti, Astana qalasynyń Mádenıet basqarmasynyń burynǵy basshysy ustalyp, ýaqytsha ustaý ızolıatoryna qamaldy. Tergeý aıasynda onyń múlkine tyıym salyndy.

Onyń ishinde 3 kommertsııalyq nysan, 2 avtoturaq orny jáne Astana qalasyndaǵy premıým sanattaǵy páter bar. Atalǵan is boıynsha kúdiktilerge tıesili 572 mıllıon teńgeniń múlkine shekteý qoıyldy.