Pavlodardyń eks-ákimi Bolat Baqaýovqa shyqqan úkimniń kúshi joıyldy

Pavlodar oblysy prokýrorynyń orynbasary jańadan ashylǵan mán-jaıǵa baılanysty sotqa júgindi. Onyń aıtýynsha, Pavlodar oblysy eks-ákiminiń isinde jańa derekter belgili boldy, sondyqtan isti qaıta qaraý kerek, dep habarlaıdy Kazinform oblystyq sotqa silteme jasap. 

Pavlodar oblysynyń ákimi Bolat Baqaýov 2020 jyly 27 mamyrda qalalyq № 2 sottyń úkimimen QR QK 361-baby 4-bóligi 3-tarmaǵy boıynsha sottalǵan.

Oǵan JShS-ine qosymsha eseptelgen salyqty azaıtý maqsatynda laýazymdyq ókilettigin asyra paıdalandy degen aıyp taǵyldy. Sonyń saldarynan atalǵan JShS salyq tólemeı qoıǵan. 

Sot úkimi shyǵyp ketkennen keıin arada eki jyl ótkende óńirlik ekonomıkalyq tergeý departamentiniń tergeýshisi 2022 jylǵy 22 qazanda qaýly shyǵaryp, qylmys quramy bolmaýyna baılanysty salyq tólemegen JShS isin toqtatty.

Óıtkeni saraptama qorytyndysy memkirister departamenti qyzmetkerleriniń qosymsha salyqty qate eseptegenin dáleldep bergen.  

Tergeýshiniń isti toqtatýyna baılanysty Pavlodar oblysynyń mamandandyrylǵan aýdanaralyq ákimshilik soty 2023 jylǵy 10 mamyrda úkimdi zańsyz dep tanyp, qosymsha salyq esepteý týraly habarlamanyń kúshi joıyldy.

«Osylaısha memleket múddesine aıtarlyqtaı zııan kelmegen. Bul mán-jaı úkim shyǵarý kezinde sotqa beımálim edi. Osyǵan baılanysty sot prokýrordyń ótinishimen kelisip, QPK 505-babynyń negizinde úkimniń kúshin joıdy» deıdi sottyń baspasóz qyzmeti. 

Qylmys quramynyń bolmaýyna baılanysty qylmystyq is toqtatyldy.

Qaýly zańdy kúshine engen joq. 

Eske sala keteıik, Bolat Baqaýov úsh jyl buryn laýazymyn asyra paıdalandy dep aıyptalyp, shartty jazaǵa sottalǵan bolatyn.