Bolat Baqaýov «Saryarqa» gaz qubyryn Baıanaýylǵa deıin tartýdy usyndy
PAVLODAR. QazAqparat - Oblys ákiminiń pikirinshe, bul jylý energııasy tapshylyǵy men ekologııa máselelerin sheshýge múmkindik beredi, dep habarlaıdy pavlodarnews.kz.
«Nur Otan» partııasynyń oblystyq fılıalynda ótken qorytyndy keńes barysynda oblys ákiminiń birinshi orynbasary Ulan Jazylbek óńirdegi ınjenerlik jelilerdiń tozǵanyn aıtty. Onyń sózine qaraǵanda, oblys boıynsha bul kórsetkish 59%. «2020 jyly 75 shaqyrym elektr symdary, 21 shaqyrym jylýmen qamtý, 49 shaqyrym sýmen qamtý jáne 37,6 shaqyrym káriz jelileriniń jóndeý jumystary josparlanýda. Árıne, bul jaǵdaıdy aıtarlyqtaı jaqsarta almaıdy. Desek te, birte-birte jelilerdi jańartyp kelemiz»,- dedi Ulan Jazylbek.
Sonymen birge, oblys ákiminiń birinshi orynbasarynyń aıtýynsha, JETs-1 tozyǵy jetkenin eskersek, balama jylý kózderin izdeı bastaý kerek. Óńir basshysy Bolat Baqaýov osy máseleni strategııalyq turǵydan sheshý qajettigin atady.
«Elbasy «Saryarqa» jobasyn usynǵanda gaz qubyryn ári qaraı Petropavl men Pavlodarǵa deıin tartýdy tapsyrǵan bolatyn. Gaz Qaraǵandyǵa jetti. Endigi ýaqytta onyń Qaraǵandydan Baıanaýylǵa tartylǵany úshin eńbektenýimiz kerek. Ári qaraı ony Maıqaıyń arqyly Ekibastuz ben Pavlodarǵa tartý qajet. Osy arqyly jylý energııasy tapshylyǵy men ekologııa máselesi sheshilmek», - deıdi Bolat Baqaýov. Óńir basshysy orynbasarlaryna osy máseleni jiti zerttep, quzyrly mınıstrlikpen sheshý múmkindikterin izdeýdi tapsyrdy.