Bolat Baqaýov reseılik bıznesmenderdi Pavlodar oblysyna ınvestıtsııa quıýǵa shaqyrdy
Kórshi eldiń Saýda-ónerkásip palatasynyń kongress-ortalyǵynda ótken kezdesýde Pavlodar oblysynyń ákimi Bolat Baqaýov Reseıdiń áleýetti ınvestorlaryna jan-jaqty qoldaý kórsetýge ýáde berdi. Onyń ishinde ınvestorlarǵa salyqtyq jeńildikter berý, keńseler, jumysshylarǵa áleýmettik qyzmetter usyný jáne taǵy da basqa jeńildikter bar.
Forýmdy ashqan Pavlodar oblysynyń ákimi bizdiń óńirdiń syrtqy saýda kóleminiń 40 paıyzdan astamy Reseı Federatsııasyna tıesili ekenin aıtty. Máselen, 2018 jyly Pavlodar oblysy men Reseıdiń óńirleri arasyndaǵy taýar aınalymy 1,8 mlrd dollardy quraǵan. Bul 2017 jyldyń kórsetkishinen 25 paıyzǵa joǵary. Atalǵan kórsetkishti arttyrý úshin Bolat Baqaýov reseılik bıznesmenderdi Pavlodar oblysyna ınvestıtsııa quıýǵa shaqyrdy.
– Bizdiń óńir toǵyz joldyń torabynda ornalasqan. Dálirek aıtsaq, joldardyń negizgi kúretamyry sanalatyn Ońtústik Sibir jáne Ortalyq Sibir temirjol jelilerinde oryn tepken. Pavlodar oblysy arqyly respýblıkalyq mańyzdaǵy joldar ótedi. Áýe qatynasy, ózen qatynasy jolǵa qoıylǵan. Oblys geografııalyq turǵydan da tıimdi ornalasqan. Pavlodar oblysynan 500 shaqyrymdyq radıýste Qazaqstan men Reseıdiń iri qalalary jatyr. Aımaqta sý men paıdaly qazbalalar qory jetkilikti. Sondaı-aq qazaqstandyq ferroqorytpanyń 65,2 paıyzy, benzınniń 46,3 paıyzy, glınozem men óńdelmegen alıýmınııdiń 99,6 paıyzy bizdiń oblysta óndiriledi. Elimizde óndiriletin kómirdiń 60 paıyzy bizdiń óńirge tıesili, – dedi Bolat Baqaýov.
Pavlodar oblysynyń ákimi reseıliktermen birleske jobalardy qarjylandyrýǵa daıyn ekenin bildirdi. Sondaı-aq óńirde kásipkerlerge árdaıy qoldaý kórsetýge daıyn ekenin jetkizdi. Budan bólek, memlekettik qoldaýdyń biryńǵaı kepildendirilgen sharalary bar. Bul rette, ınvestorlarǵa eki jylǵa qaıtarymsyz negizde ofıster beriledi. Investorlar jaldaıtyn qyzmetkerlerdiń otbasy múshelerin jumyspen, oqý oryndarymen qamtý da jolǵa qoıylǵan.
Máskeýdegi bıznes-forýmǵa «Kazakh Invest» ulttyq kompanııasynyń basshysy Baýyrjan Sartbaevtyń da qatysqanyn atap ótken jón. Ol reseılik kásipkerlerge Reseı ımporttap otyrǵan Qazaqstanda óndiriletin taýarlardy oqshaýlaýdy usyndy.
– Bizdiń kompanııa áleýetti elderdiń tizimin jasady. Bul rette, biz úshin Reseı Federatsııasymen baılanys ornatý mańyzdy baǵyttyń biri. Reseılik ınvestorlardy kóbinese Qazaqstandaǵy saıası turaqtylyq, kásipkerlik qyzmetti retteıtin zańnamalyq baza, salyqtyq jeńildikter jáne ınfraqurylymnyń damýy qyzyqtyrady. Búginde reseılik ınvestorlarmen jalpy quny 4,8 mlrd dollardy quraıtyn jobalar boıynsha jumys júrgizilýde, – dedi Baýyrjan Sartbaev.
Forým qorytyndysy boıynsha birneshe ekijaqty kelisimge qol qoıý josparlanǵan. Sondaı-aq Pavlodar oblysynyń ákimi birqatar reseılik bıznesmen kelissózder júrgizbek.
