Bolat Baqaýov: Pavlodarda memorgandar men ÚEU-nyń birge jumys jasaýynda tıimdi tájirıbe qalyptasty
Plenarlyq otyrysty ashqan oblys ákimi Bolat Baqaýov úkimettik emes uıymdardyń rólin arttyrý - «100 naqty qadam» Ult josparyn júzege asyrýdaǵy basym baǵyttardyń biri ekendigin atap ótti.
«Barshamyzǵa belgili, azamattyq sektordyń qoǵamdyq-saıası ómirdegi mańyzdylyǵy óte zor. Óńirimizdegi úkimettik emes uıymdarǵa bastamashyldyq pen eńbekqorlyq tán. Oblysymyzda memlekettik organdar men úkimettik emes uıymdar arasyndaǵy birigip jumys jasaýda tıimdi tájirıbe qalyptasty», - dedi Bolat Baqaýov.
Aımaq basshysy atap ótkendeı, oblysta 692 úkimettik emes uıym tirkelgen. Ókinishke oraı, tirkelgen ÚEU ishinde 300-den astam uıymmen baılanys úzilip, olar tek qaǵaz júzinde ǵana jumys isteıtin kórinedi.
Bolat Baqaýov keıbir birlestikter óz qyzmetinde tek memlekettik bıýdjetten bólinetin qarajatqa ǵana ıek artatynyn atap ótip, bul tájirıbeniń qanshalyqty burys ekendigi týraly pikirin aıtty.
«Mundaı ádis uıymdardyń turaqty qyzmetin qamtamasyz ete almaıdy. Mysal úshin keıbir úkimettik emes uıymdar grantty atqaryp bolǵan soń «uıqyǵa ketedi» nemese múldem joǵalyp ketedi, - dedi óńir basshysy.
Oblys ákimi áleýmettik máselelerdi sheshýge tyryspaıtyn, bıýdjetti qalaı ıgeremin dep qana júretin ÚEU-dy zańnamaǵa sáıkes is júzinde jumys istemeıtin birlestikterdi joıý qajettigin atap ótti. Bolat Baqaýov ózdiginen jumys isteıtin birlestikter arasynda «Aýǵan soǵysy ardagerleri men múgedekteriniń» jáne «Meıirimdiler klýby» qoǵamdyq qorlarynyń eńbekterin erekshe atap ótti.
Óńir basshysynyń aıtýynsha teń quqyly áriptes bolý úshin ÚEU bıýdjet qarajatyna degen táýeldiliginen arylyp, biliktiligin arttyrý qajet. Odan bólek, oblys ákimi aýyldyq eldi-mekenderdegi ÚEU-dyń qalada jumys isteıtin birlestikterden góri belsendiligi tómen ekendigin aıtty. Osy olqylyqty joıý maqsatynda Bolat Baqaýov aımaǵymyzdyń qalalary men aýdandarynyń basshylyqtaryna aýyldyq úkimettik emes uıymdar ókilderin oqytýdy tapsyrdy. Qıyndyqtarǵa qaramastan, jumysty dóńgeletip áketken uıymdar aýylda da bar. Bolat Baqaýov sondaı uıymdardyń biri Sharbaqty aýdanyndaǵy Esilbaı aýylynda bar ekenin atap ótti. Esilbaılyq belsendiler óz kúshimen aýylyn abattandyryp, eldi-mekendi kórkeıtýde.
Sonymen birge, Bolat Baqaýov jyl sońyna deıin Pavlodarda «Azamattyq alıans úıi» ashylatynyn málimdedi. Atalǵan ǵımarat barlyq ÚEU-dy bir shańyraq astyna biriktirý maqsatynda ashylmaq.
Azamattyq alıans vıtse-prezıdenti Musaǵalı Dýambekovtyń aıtýynsha, aımaqtardaǵy azamattyq qoǵamnyń mańyzdylyǵy artyp keledi.
«Bıyl belsendilik arttyrǵanymyz kezdeısoqtyq emes. Qazaqstan eń damyǵan 30 eldiń qataryna enýdi maqsat tutýda. Ol maqsatqa jetýdiń alǵysharttarynyń biri azamattyq qoǵam qaǵıdalaryn júzege asyrý bolyp tabylady», - deıdi Musaǵalı Dýambekov.
Forým barysynda ózge de pikirler tyńdalyp, jıyn sońynda óńirimizdiń úzdik ÚEU-dary dıplomdar jáne aqshalaı syılyqtarmen marapattaldy. Jeti birlestik qyzmetin sátti atqarǵandary úshin 50 myń teńgelik sertıfıkattarǵa ıe boldy.
Foto: Olga Býgaeva
