Bolat Baqaýov Pavlodar oblysynyń demografııalyq jaǵdaıyn zertteýdi tapsyrdy
PAVLODAR. QazAqparat - Pavlodar oblystyq máslıhattyń kezekten tys sessııasynda oblys ákimi Bolat Baqaýov óńirdegi demografııalyq jaǵdaıǵa erekshe toqtalyp ótti, dep habarlaıdy pavlodarnews.kz.
«Bizde jańa týǵan balalardyń sany nelikten azaıyp jatqanyn zertteýimiz kerek, Óńirde kóptegen aýrýlar boıynsha, onyń ishinde onkologııalyq aýrýlarǵa qatysty jaǵdaı nelikten kúrdeli? Osy oraıda ekologııalyq ahýalǵa kiná taǵa bermeýimiz kerek. Sondyqtan osy aıtylǵan kúrdeli máselelerdi birlese sheship, naqty nátıjeni kózdeýimiz qajet», - deıdi Bolat Baqaýov.
Aımaq basshysy 2019 jyly halyq qalaýlylarynyń óńirdiń tynys-tirshiligin jiti nazarda ustaý qajettiligin atap ótip, turǵyndardyń alańdaýshylyq bildiretin máselelerdi birlese sheshýge shaqyrdy.
«Oblys boıynsha shaǵyn jáne orta kásipkerlik sýbektileriniń sany azaıýda. Barlyq basqarmalarǵa bıznesti qoldaýdy tapsyrýdamyz. Bul jerde «Atamekenniń» de qosar úlesi zor bolýy kerek», - deıdi Bolat Baqaýov.
Otyrys barysynda «Romat» farmatsevtıkalyq kompanııasyna qatysty másele de nazardan tys qalmady.
«Kezinde Qazaqstannyń 50 paıyz naryǵyn dári-dármekpen qamtamasyz etken kompanııanyń jaǵdaıyna ne bolǵanyn bilesizder. Máselelerdi ótip ketkennen keıin emes, olardyń aldyn-alyp ýaqtyly sheshýge tyrysý kerek. Osy oraıda barlyqtaryńyzdy belsendilikke shaqyramyn», - deıdi Bolat Baqaýov.
Esterińizge sala keteıik, Pavlodar oblysynda sońǵy 10 jyl ishinde aýyl turǵyndarynyń sany 34 myńǵa azaıǵan. Osy ýaqyt ishinde elden qalaǵa kóshken halyq sany eki aýdan halqynyń sanymen para-par. Qazirgi kezde oblysta aýylda turatyn halyq úlesi nebary 30%. Qazaqstanda bul kórsetkish 42%-dan artyq.
