Bolat Baqaýov: Pavlodar oblysyndaǵy júk tasymaldaý tártibin ózgertemiz
NUR-SULTAN. QazAqparat - Aımaq basshysy Ertis óńirinde joldardaǵy shamadan tys júk tasýǵa qarsy kúres júrgiziletinin eske saldy, dep habarlaıdy pavlodarnews.kz.
Pavlodar oblysynyń ákimi Ertis jáne Jelezın aýdandaryndaǵy jóndeletin jol ýchaskelerine bardy. Ol tek osy jyly ǵana óńirde joldardy jóndeýge jáne kútip ustaýǵa 15 mıllıard teńgeden astam qarjy bólingenin atap ótti.
«Biz úsh jyl boıy oblys joldarymen júıeli túrde aınalysýdamyz jáne jaqsy ári qanaǵattanarlyq jaǵdaıdaǵy joldardyń úlesin 82%-ǵa deıin jetkize aldyq. Olardy tıisti jaǵdaıda saqtaý úshin biz artyq júktermen kúresti jalǵastyramyz», - dep málimdedi Bolat Baqaýov.
Sonymen qatar, qaıta tıeý faktisi úshin mashına júrgizýshisine jáne júk jóneltýshige de aıyppul salynady. Basqasha aıtqanda, artyq júkteme mashınaǵa búgin tıimdi emes, óıtkeni dittegen pýnktiniń ornyna aıyppul turaǵyna qoıylýy múmkin. Aldaǵy kúzde bizdiń oblysta júk tasymaldaý mádenıetin ózgertemiz dep oılaımyn. Búginde merdiger uıymdar Ertis aýdany Golýbovka aýylyna aparatyn joldy jóndeý jumystaryn aıaqtaýda.
Jelezın aýdanynyń Mıhaılovka aýylyna aparatyn joldy retke keltirdi.
- Men 1997 jyldan bastap Jelezın aýdanynda jumys isteımin jáne osy jol úshin árqashan janym aýyrady, - deıdi «Altyn jer» sharýa qojalyǵynyń basshysy Marat Morozov. - Áıteýir bireýdiń osy jolǵa qoly tıdi! Bul naǵyz jasalýy tıis mańyzdy is ekenine shúbá keltirmeımin. Birinshiden, aýylǵa deıin yńǵaıly asfaltpen jetemiz jáne joldyń sapasy úshin ýaıymdamaımyz. Ekinshiden, júkterdi jetkizý ýaqyty qysqardy, bul men úshin bıznesmen retinde óte mańyzdy.
Kelesi jyly «Lenın - Rýsskaıa polıana» jolynyń 80 shaqyrymyn abattandyrýdy bastaý josparlanyp otyr. Bul maqsatqa respýblıkalyq bıýdjetten 2 mıllıard teńge bólinedi. Jelezın aýdanynda «Jelezınka - Veselaıa roşa - Myńkól» jolynyń birneshe ýchaskelerin jóndeý jumystary jalǵastyrylady, sondaı-aq Kýzmıno jáne Lesnoe aýyldarynyń arasyndaǵy 14 shaqyrym joldy jóndeý josparlanýda. Eger joba iske asyryla bastasa, onyń quny 260 mıllıon teńgeden asady.
