Bolat Baqaýov Pavlodar oblysynda sporttyq balyq aýlaý oryndaryn damytýdy tapsyrdy
ASTANA. QazAqparat - Pavlodar oblysynda ǵalymdar men ańshylyq sharýashylyqtaryn, sý aıdynyn paıdalanýshylardy jumyldyrý arqyly sporttyq balyq aýlaý oryndaryn damytý usynyldy, dep habarlaıdy pavlodarnews.kz.
Mundaı tapsyrmany aımaq basshysy Bolat Baqaýov oblys ákimdiginde ótken keńeıtilgen apparattyq jıynda júktedi.
«Árıne, munyń barlyǵy bir kúndik jumys emes. Sý aıdyny tarıhyn kóterińizder. Oblysta sporttyq balyq aýlaý oryndary joq. Qazirgi kúni táýlik boıy Ýsolka ózeniniń jaǵasynda adamdar jumys isteıdi, degenmen turǵyndar báribir de juqa muzdyń ústine bir ýys balyq úshin barady. Sol jerden kúni boıy otyrsa da úsh keli de balyq shyqpaıdy. Al muz kez kelgen ýaqytta opyrylyp ketýi múmkin», - dedi Bolat Baqaýov.
Budan basqa, oblys ákimi eki jyl qatarynan kóktemgi ańshylyq maýsymy jabylǵanymen, meıramhanalarda súırik balyǵy paıdalanatynyn atap ótti.
«Bul másele birneshe jyl qatarynan kóterilip keledi. Bul sharanyń ekologııalyq turǵydan alǵanda paıdasy kóp. Ertis ózeninde tabıǵatty qorǵaý sharalary júrgiziledi. Alaıda meıramhanalardaǵy súırik balyǵy qaıdan paıda bolady? Sondyqtan jergilikti polıtsııa qyzmeti jumys isteý kerek»-dep qosty oblys basshysy.
Oblystyq ІІD jergilikti polıtsııa qyzmetiniń bastyǵy Jasqaırat Qaıyrov óńirde qyzyl balyq boıynsha qylmystyq is tirkelmegenin jetkizdi.
«Aımaqta zańsyz balyq aýlaý boıynsha 105 fakti anyqtaldy. Nátıjesinde 1 mln 274 teńge aıyppul salynyp, onyń 1 mln 40 myń teńgesi óndirilgen. Qyzyl balyq boıynsha tıisti jumystar atqarylady»,-dedi J.Qaıyrov.
Oblystyq orman sharýashylyǵy jáne janýarlar dúnıesi aýmaqtyq ınspektsııasy basshysynyń mindetin atqarýshy Qaırat Ábilbaevtyń aıtýynsha, óńirde balyq sharýashylyǵyn odan ári damytý boıynsha 110 sý aıdyny bekitilgen. Onyń ishinde 105-i kásipshilik, bireýi áýesqoılyq (sporttyq) balyq aýlaý jáne tórteýi baǵaly balyq túrlerin ósirý jáne saýdalaý maqsatynda qoldanylady.
