Bolat Baqaýov ózge óńir turǵyndaryn Pavlodar oblysyna kóship kelýge shaqyrdy
PAVLODAR. QazAqparat - Pavlodar oblysynyń ákimi Bolat Baqaýov Instagram-daǵy resmı paraqshasy arqyly halqy tyǵyz ornalasqan óńirlerdiń turǵyndaryn oblysqa kóship kelýge shaqyrdy, dep habarlaıdy pavlodarnews.kz.
Instagram-ǵa jazba qaldyrǵan Bolat Baqaýov, bıyl Pavlodar oblysynda «Nurly Ertis» baǵdarlamasy iske qosylǵanyn atap ótti. Baǵdarlama aıasynda 1241 adam Nur-Sultan qalasynan kóship kelgen. Sondaı-aq el astanasy men ońtústik óńirlerden 220 otbasy Pavlodar oblysyna qonys aýdarypty. - Olardyń jartysynan kóbi – kópbalaly otbasylar. Qazir árbir otbasynyń jeke baspanasy bar. Kóship kelgen eńbekke jaramdy adamdardyń bári turaqty jumyspen qamtyldy. Olardyń balalaryna balabaqsha men mektepterden oryn berildi. Bul rette, Pavlodar oblysyndaǵy bilim berý deńgeıiniń joǵary ekenin kópshilik jaqsy biledi, – dep atap ótken Pavlodar oblysynyń ákimi.
Bolat Baqaýovtyń jazýynsha, búginde Pavlodar oblysynda 25 myń bos jumys orny bar. - Qazaqstanda jumys kúshi kóp óńirler bar. Ol jaqta jumys tabý qıyn. Al bizdiń oblysta 25 000 jumys orny bos tur. Onyń 10 myńy – turaqty jumys. Aımaqta iri óndiristik kásiporyndar jumys isteıdi. Shaǵyn jáne orta bıznes qanat jaıýda. Agroónerkásip kesheni de qarqyndy damý ústinde. Osy oraıda, «Nurly Ertis» baǵdarlamasy aıasynda árbir turǵyndy baspanamen, medıtsınalyq kómekpen, turaqty jumyspen, olardyń balalaryn bilim berý uıymdarymen qamtamasyz etetinimizdi eske salǵym keledi, – dedi Bolat Baqaýov.
Aımaq basshysy Instagram-daǵy dostaryn atalǵan aqparatty bólisip, taratýǵa shaqyrdy. - Pavlodar oblysyna kóship kelgisi keletin tanystaryńyzdy, týystaryńyzdy belgileı otyryńyzdar, – dep túıindeıdi Bolat Jumabekuly.
