Bolat Baqaýov kópbalaly anaǵa shtattan tys keńesshi qyzmetin usyndy
PAVLODAR. QazAqparat - Pavlodar oblysynyń ákimi Bolat Baqaýov kópbalaly analarmen kezdesti. «Nur Otan» partııasynyń oblystyq fılıalynda ótken kezdesýge úsh júzge jýyq adam qatysty, dep habarlaıdy QazAqparat.
Óńir ákimdiginen málim etkendeı, eki jarym saǵatqa sozylǵan júzdesý barysynda turǵyn úımen qamtamasyz etý, kópbalaly otbasylardy áleýmettik qoldaý máseleleri sóz boldy.
Aımaq basshysy árbir kópbalaly otbasynyń áleýmettik tólqujaty jasalatynyn aıtty. Sonymen birge, ol ár kópbalaly otbasyǵa depýtattar, kásipkerler, sharýa qojalyqtarynyń basshylary arasynan demeýshiler taǵaıyndaýdy usyndy. Sondaı-aq, arnaıy komıssııa qurylyp, onyń quramyna kópbalaly analar da engiziledi.
Kezdesýge kelgenderdiń kópshiligi búkil otbasymen keldi.
«Árıne, Siz zańdy ózgerte almaıtynyńyzdy jaqsy túsinemiz.Biz bılik organdary halyqtyń muń-muqtajyn bilsin dep keldik», - dedi tórt balany jalǵyz tárbıelep otyrǵan Dınara Salyqova.
Kópbalaly otbasylardy tolǵandyratyn basty másele - járdemaqynyń kólemi.
«Tórt balaǵa men aı saıyn 10 500 teńge alamyn. Balabaqshalar baldyrǵandardy tek úsh jastan ǵana qabyldaıdy. Al balaǵa beriletin járdemaqy tek bir jasqa deıin tólenedi. Bul durys emes!», - deıdi ol.
Óz kezeginde oblys ákimi Dınara Salyqovaǵa osy másele boıynsha qurylatyn bastamashyl toptyń quramyna qosylyp, shtattan tys keńesshi bolýdy usyndy.
«Siz kóp balaly analardyń atynan sóılep tursyz ǵoı. Sondyqtan sizge meniń shtattan tys keńesshim bolyp, bastamashyl toptyń quramyna kirýdi usynamyn», - dedi Bolat Baqaýov.
Aımaq basshysy ózi de kópbalaly otbasynda dúnıege kelip, qazirgi kezde bes bala tárbıelep otyrǵanyn aıtty.
«Bala kezimnen eńbekke baýlyp ósirgen ata-anama alǵysym sheksiz. Kópbalaly otbasylardyń qıyndyqtary maǵan jaqsy tanys. Biz oblystyń qalalary men aýdandarynda zertteý júrgizip, áleýmettik jaǵdaıy tómen otbasylardy anyqtaýdy bastadyq», - dedi ol.
Aımaq basshysynyń aıtýynsha, mundaı januıalardy turǵyn úı, áleýmettik tólemderdiń kólemin arttyrý, tegin dári-dármekpen qamtamasyz etý, balabaqshaǵa ornalasý, qoǵamdyq kóliktegi jeńildikter máselesi tolǵandyrady. Oblys ákimi óńirdegi árbir kópbalaly, az qamtylǵan otbasy nazardan tys qalmaıdy dep sendirdi.
Salalyq áleýmettik qorǵaý basqarmasynyń málimeti boıynsha, oblysta 8625 kópbalaly otbasy bar. Olardyń ishinde 3839 januıa tórt jáne odan da kóp kámeletke tolmaǵan bala tárbıelep otyr.
Óńirdegi áleýmettik osal toptardyń otbasylarynda tárbıelenetin on úsh myń bala tegin ystyq tamaqpen qamtamasyz etilgen. «Mektepke jol» aktsııasy boıynsha osy oqý jylynda on jeti myń balaǵa 150,8 myń teńgege kómek kórsetildi. Bul somanyń 63,5 mıllıon teńgesi bıýdjetten tys qarajat. «Qamqorlyq» aktsııasy boıynsha jyl basynan beri 8738 balaǵa 77 mln teńgeniń kómegi kórsetildi, bul somanyń 27,2 mıllıon teńgesi bıýdjetten tys qarajat.
Aımaq basshysy atap ótkendeı áleýmettik osal otbasydan shyqqan stýdent jastar da nazardan tys qalmaıdy. Olarǵa tegin ystyq tamaq, 4 AEK kólemindegi jolaqynyń ótemi, jataqhanalarda tegin turý, qoǵamdyq kóliktegi 50 paıyz jeńildik sekildi qoldaý sharalary qarastyrylǵan. Sonymen birge, olarǵa jumysqa ornalasý, oqýǵa túsý jáne tegin medıtsınalyq kómek alý boıynsha da qoldaý kórsetiledi.
Áleýmettik osal toptyń otbasylarynyń problemalary jergilikti ári úkimettik deńgeıde sheshiletin bolady. Aımaq basshysynyń orynbasary mundaı kezdesýlerdi toqsan saıyn, al oblys ákimi jarty jylda bir ret ótkizip otyrady.
