Bolat Baqaýov: Kómir baǵasyn turaqty ustaý qajet
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypov óńirdegi áleýmettik sala nysandarynyń qazandyqtaryna aǵymdaǵy jylý maýsymyna qatty otyn satyp alý úshin 1,4 mlrd teńge qarastyrylǵanyn atap ótti. - Búgingi kúni bul saladaǵy nysandarǵa 141 myń tonna kómir jetkizý boıynsha shart jasaldy, - dedi Erjan Imanzaıpov. - ıAǵnı, bul qajet jospardyń 97 paıyzyn quraıdy. Sonymen qatar, aǵymdaǵy jylý berý maýsymyna jylý nysandaryn daıyndaý kezinde oblystaǵy elektr stantsııalarynda 33 negizgi jabdyqty kúrdeli jáne keńeıtilgen aǵymy jóndeýden ótkizý josparlanǵan. Onyń ishinde 12-si - energııa blogy, 15-i - qazandyq, altaýy - trýbına. 14-i jóndelip qoldanysqa engizildi jáne 16-sy jóndelip jatyr, úsheýinde ázirge jóndeý jumystary bastalǵan joq».
Erjan Imanzaıypovtyń aıtýynsha, oblys boıynsha 2414 kóp páterli turǵyn úıdi jylytý maýsymyna daıyndaý josparlanǵan. Qazirgi kezde onyń 56 paıyzy daıyn. Pavlodar qalasynda turǵyn úılerdiń 40 paıyzy, Aqsý qalasynda 15 paıyzy qysqy kezeńge daıyndyq sharalarynan ótken.
Oblys ákimi Bolat Baqaýov birinshi orynbasary Ulan Jazylbekke tehnıkalar egistik ónimderin jınaýǵa kirispeı turyp kómir tasyp alýdy tapsyrdy. - Qazir kómir shyǵaratyn ken oryndarynda keptelis joq, - dedi óńir basshysy. - Tehnıkalar da ónim jınaýǵa kirispegen. Ázirge bos tur. Sondyqtan daıyndyqqa kirisý kerek. Áleýmettik sala nysandaryna kómir jetkizilgeni jóninde kún saıyn esep berilip otyrylsyn. Sondaı-aq kómir baǵasyna saraptama jasańyzdar. Baǵanyń maýsym boıy turaqty bolýyn qadaǵalańyz».
