Bolat Baqaýov qaıta daıarlaý kýrstaryn aıaqtaǵandardy jumyspen qamtýdy kúsheıtýdi tapsyrdy
PAVLODAR. QazAqparat - Óńir basshysy «Eńbek» memlekettik baǵdarlamasy aıasynda kadrlardy qaıta daıarlaý kýrstaryn támamdaǵandardyń jumyspen qamtylý deńgeıiniń tómendigine nazar aýdardy, dep habarlaıdy pavlodarnews.kz.
Oblystyq ákimdikte ótken apparattyq keńeste Bolat Baqaýov oblystyq jumyspen qamtýdy úılestirý jáne áleýmettik baǵdarlamalar basqarmasynyń jumysyna baǵa berdi. - Oblystyq áleýmettik qorǵaý basqarmasy qyrýar jumys kólemin atqarýda. Respýblıkalyq deńgeıde nátıje jaman emes. Jyl qorytyndylary boıynsha mınıstrlik taǵaıyndaǵan kórsetkishterge qol jetkizetindigińizge kúmán keltirmeımin»,- dedi Bolat Baqaýov.
Sonymen birge oblys ákiminiń pikirinshe, «Eńbek» memlekettik baǵdarlamasynyń keıbir tustarynyń júzege asyrylýy tıisti deńgeıde emes. Onyń ishinde Bolat Baqaýov qaıta daıarlaý kýrstaryn bitirip shyqqan mamandar arasyndaǵy jumyspen qamtý kórsetkishiniń tómendigine basa kóńil aýdardy. - Úsh jyl ishinde «Eńbek» baǵdarlamasy boıynsha kóptegen adam oqyp shyqty, - deıdi Bolat Baqaýov. – Qyrýar qarajat jumsalǵanymen, bos jumys oryndary tolmaǵan kúıde saqtaýly. Jumystyń tıimdiligi qaıda? Óńir basshysynyń aıtýynsha, oblysta jumysshy kadrlardyń jetispeýshiligi sezilýde. - Jaqynda «StekloMır» kásipornyn aralap shyqtym. Onda adam jetispeı jatyr. Kez kelgen kásiporynǵa barsańyz, barlyq jerde 120-150 myń teńgege jumys isteıtin adam taba almaı júrmiz dep aıtady. «Neftehım LTD» uıymynda da jaǵdaı osyndaı. Oqytqan adamdarymyz nege jumys istegisi kelmeıdi? – deıdi Bolat Baqaýov. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qaırat Nurmaǵambetovtiń aıtýyna qaraǵanda, munyń sebepteriniń biri – jumys berýshilerdegi jaýapkershiliktiń joqtyǵy. - Biz jumys berýshilerdiń ótinishteri boıynsha jumys isteımiz, - deıdi Qaırat Nurmaǵambetov. – «Neftehım LTD» alyp qarasaq, olar bıyl 139 tiginshi suraǵan. Úsh aı ishinde olardy oqytyp shyqsaq, «Neftehım LTD» mamandarymyzdy jumysqa alýdan bas tartty.
Qaırat Nurmaǵambetov atap ótkendeı, atalǵan uıymǵa jiberilgen 137 tiginshiniń nebári 49-y ǵana jumysqa qabyldandy. Qalǵanyn «Neftehım LTD» úsh aılyq merzimdi kútpeı syrttan alǵan. Qazirgi kezde oblystyq basqarma QR Eńbek jáne turǵyndardy áleýmettik qorǵaý mınıstrligine jumys berýshilerdiń jaýapkershiligin kúsheıtý jóninde usynys joldaǵan.
Aıta keteıik, bıyl óńirimizde kadrlardy qysqa merzimdi daıarlaý boıynsha 1234 adam mamandyq alsa, olardyń nebári 701-i jumysqa qabyldanǵan.
