Bolat Baqaýov: Kartop eksporty boıynsha problema joq
ASTANA. QazAqparat - Pavlodar oblysynda kartop eksporty boıynsha problema joq. Bul týraly Ortalyq kommýnıkatsııalar qyzmetinde atalǵan óńirdiń ákimi Bolat Baqaýov málim etti, dep habarlaıdy QazAqparat.
Onyń sózine qaraǵanda, oblysta jınalǵan kartoptyń (519,9 myń tonna) kólemi 7 paıyzǵa artty. Jınalǵan ónim óńirdi tolyqtaı qamtamasyz etedi, sondaı-aq 134 myń tonna el ishinde jáne shetelge eksporttalady.
«Túrli naryqtarǵa undy, kartopty eksporttaımyz. Ótken jyly Ózbekstanǵa 80 myń tonna kartop jóneltsek, al bıyl 70 myń tonnaǵa kelisimshart bar. Byltyrdan beri Túrkııaǵa jasymyq eksporttap jatyrmyz. Bizde ónimdi satýǵa qatysty problema joq, biraq baǵaǵa qatysty másele boldy. Degenmen de búginde astyq pen kókóniske baǵa turaqtalyp keledi», - dedi Bolat Baqaýov.
Budan buryn habarlanǵandaı, óńir ákimi Pavlodar oblysynda kommýnaldyq qyzmetterdiń tarıfi tómendeıtinin aıtqan bolatyn.
