Bolat Baqaýov: Qart Ertistiń jaǵasyna bizdi perzenttik júrek alyp keldi

ASTANA. QazAqparat - 115 kıiz úı tigilip, myńdaǵan adamdy áserli de ádemi sharalarǵa kýá qylǵan «Uly dala eli» festıvali pavlodarlyq óner maıtalmandarynyń kontsertimen bastaldy, dep habarlaıdy pavlodarnews.kz .

Kerýenmen tizilip atqa mingen er jigitter alyp sahnanyń aldynan dúbirlete shaýyp ótip, mańyzdy merekege kórik qosty.

 

« Qasıetti Ertis Baıan jerinde «Uly dala eli» festıvalin ótkizý ıgi dástúrge aınalyp otyr», - dep sóz bastady Pavlodar oblysynyń ákimi Bolat Baqaýov saltanatty ashylý rásiminde. «Bıylǵy aýqymdy shara Elbasymyzdyń «Bolashaqqa baǵdar: rýhanı jańǵyrý» baǵdarlamasy aıasynda júzege asýda. Prezıdent sózimen aıtar bolsaq, «Biz bárin de kórgen halyqpyz, bárine kóngen halyqpyz». Búgingi tańda rýhymyzdy tiktep, jarqyn bolashaqqa bet túzedik. Osynaý dýmandy toıǵa Mońǵolııa, Reseı, Qytaı syndy elderden meımandar men óńirimizdiń damýyna eleýli úles qosqan tulǵalar kelip otyr. Talaı ǵasyr el tarıhyna kýá bolǵan qart Ertis jaǵasyna bárimizdi perzenttik júrek alyp kelip otyr. «Uly dala eli» degen ataýǵa ıe bolǵan ıgilikti shara aldaǵy ýaqytta jalǵasyn tabatyn bolady. Barlyqtaryńyzǵa qutty bolsyn».

 

Aıta keteıik, «Uly dala eli» etnofestıvali Pavlodarda 12-13 tamyz kúnderi toılanýda. Búgingi merekege kelgen qaýym úshin 300 dombyrashy bir ýaqytta «Qum jylan» kúıin oryndady. «Ulytaý», «Muzart» toptary men Tóreǵalı Tóreáli, Nurlan Álimjanov syndy qazaq estradasynyń juldyzdary án shyrqady. Parashıýtshiler shashý shashty. Tústen keıin «Kelinder saıysy» jáne taǵy da basqa jarystar uıymdastyryldy.