Bolat Baqaýov ınvestorlarǵa jaǵdaı jasamaǵan sheneýnikterdi synǵa aldy
PAVLODAR. QazAqparat - Pavlodar oblysynyń ákimi Bolat Baqaýov óńirdegi ekonomıkanyń damýyna nıetti ınvestorlarmen kezdesý ótkizdi, dep habarlaıdy «QazAqparat» HAA tilshisi.
Kezdesý barysynda «Jumadil» JK ókili jer daýynyń saldarynan jol boıyndaǵy keshenniń qurylysy kesheýildep turǵandyǵyn málimdedi.
Kásipkerdiń aıtýynsha, onyń Aqsý aýyly mańyndaǵy Qarabaı aýylyna jaqyn jerdegi jer ýchaskesin paıdalaný quqyǵyn ala almaı júrgenine jarty jyl bolǵan.
«Barlyq qajetti jumystar júrgizildi, «PETK» AQ jáne «QazAvtoJol» AQ-men tehnıkalyq sharttar jasaldy, - dedi kásipker Rınat Aqanov. - Alaıda, Aqsý prokýratýrasynyń usynysy negizinde Alǵabas aýyly ákiminiń jerdi ýaqytsha paıdalaný quqyǵyn berý buıryǵyn zańsyz dep taný jóninde talap berilgen» - delingen ákimdiktiń baspasóz baıanynda.
Buǵan jaýap retinde óńir ákimi jer máselesiniń sheshýge bir apta ýaqyt berdi.
«Eger máseleni sheshpeı, osylaı soza berseńder kásipker bul aralyqta basqa óńirge ketip qalady. Eger kásipker úshin eń qajet jerdi bere almasaq, onda basqa áńgime qozǵaýdyń keregi joq», -dep túıdi ákim.
Aıta keteıik, úsh gektar jerdi alyp jatqan jer ýchaskesine kásipkerler 25 oryndyq qonaqúı, 120 adamǵa arnalǵan dámhana-meıramhana, dúken, medıtsınalyq pýnkt jáne monsha keshenin salýdy josparlap otyr. Jobanyń jalpy quny 200 mıllıon teńgeni quraıdy.
