Bolat Baqaýov daryndy balalarǵa smartfondar syıǵa tartty
ASTANA. QazAqparat - Pavlodarda «Krendel» banket-hollynda oblys ákimi Bolat Baqaýov úzdik oqýshylarmen kezdesip, «Daryn-2017» belgisi men smartfondar, alǵys hattar tabys etti.
Saltanatty keshke 2016-2017 oqý jylyndaǵy halyqaralyq, respýblıkalyq olımpıadalarynyń 59 jeńimpazy men júldegeri jáne olardy daıyndaǵan ustazdary qatysty, dep habarlaıdy pavlodarnews.kz.
«Egemendi elimizdiń ózderińdeı daryndy jastarymen júzdesý men úshin úlken qýanysh», - degen óńir basshysy jas órenderdi quttyqtady. - Halqymyz «Daryndynyń joly - dańǵyl» dep beker aıtpaǵan. Úzdik bilim men tálim-tárbıe ǵana bıik belesterge jetkizedi. Sondyqtan sizderdiń mindetterińiz - básekege qabiletti bolý. Oblysta jas urpaqtyń jan-jaqty bilim alýyna barlyq jaǵdaı jasalǵan. Búgingi kúni ósemin degen jas talantqa jol ashyq. Daryndy jastar - elimizdiń jarqyn bolashaǵy. Bilim men ǵylymnyń ınnovatsııalyq ındýstrııasy - Qazaqstannyń strategııalyq resýrsy. Elimizdiń ál-aýqatyn arttyrý, jańa ǵylymı jańalyqtardy ashý, elimizde beıbitishilik pen kelisimdi saqtaý sizderge júkteledi. Búgingi jastardy osyndaı deńgeıge jetkizgen mektep basshylary men pedagogtarǵa joǵary kásibıligi men óz isine degen súıispenshiligi úshin jáne zor úmit artyp otyrǵan ata-analar qaýymyna alǵys bildiremin», - dedi óńir basshysy.
Baǵaly syılyqtarmen marapattalǵan jastardyń ishinde XII Jáýtikov halyqaralyq olımpıadasynyń altyn medal ıegeri, XVI «Jibek joly» halyqaralyq matematıkalyq olımpıadasynyń kúmis medal ıegeri, «Jas daryn» mamandandyrylǵan mektebiniń oqýshysy Mohammed-Álı Ámir, 51-halyqaralyq Mendeleev olımpıadasynyń kúmis medal ıegeri, A. Bekturov atyndaǵy ІІІ halyqaralyq hımııa olımpıadasynyń altyn medal ıegeri, uldarǵa arnalǵan «Bilim-ınnovatsııa» lıtseıiniń oqýshysy Temirlan Rahymov jáne basqalary bar. Budan basqa, «Qazaqstandyq salalyq bilim jáne ǵylym qyzmetkerleri kásipodaǵy Pavlodar oblystyq uıymy» qoǵamdyq birlestiginiń tóraıymy Gúlbaram Naýryzbaeva bilim salasyndaǵy joǵary jetistigi úshin 15 ustazǵa Altaı ólkesiniń Belokýrıha shıpajaıyna joldama tabys etti. - Bıyl pánder olımpıadasynda geografııa páninen ekinshi oryn, byltyr oblystyq pán olımpıadasynda birinshi oryndy ıelengen bolatynmyn. Bolashaqta Nazarbaev Ýnıversıtetinde ekonomıst mamandyǵy boıynsha bilim alýdy armandaımyn. Oqý úzdigimin. Osyndaı bıik beleske jetelep, baǵyt siltegen ustazdarym Ásel Qamalıdenqyzy men Laýra Sartaıqyzyna alǵysym zor, - deıdi «Jas daryn» mamandandyrylǵan mektebiniń 10-synyp oqýshysy Rahat Qatbek. Óz kezeginde jyldaǵy dástúr boıynsha daryndy balalarǵa arnalǵan № 3 gımnazııanyń 11-synyp oqýshysy Sheralı Razıkov jastardyń atynan aımaq basshysyna «Daryn» atty kitap syıǵa tartty.
Eske sala keteıik, respýblıkalyq olımpıadanyń qorytyndysy boıynsha Pavlodar oblysynyń qurama komandasy birinshi jalpy komandalyq orynǵa ıe bolyp, «Eń úzdik olımpıadalyq komanda-2017» sertıfıkatymen marapattalǵan. Komanda qorjyny 55 medalmen tolyqty. Onyń ishinde jeteýi - altyn, 15-i - kúmis jáne 33-i - qola.
