Bolat Baqaýov: Aýyldaǵy jas pedagogtarǵa baspanamen kómektesý kerek
ASTANA. QazAqparat - Ótken jyly Pavlodar oblysynda baspanaǵa muqtaj aýyl muǵalimderiniń 10 paıyzy ǵana úımen qamtamasyz etilgen, dep habarlaıdy pavlodarnews.kz.
Aýylda jumys jasaýǵa attanǵan jas mamandardyń kóbisin mazalaıtyn másele jaıly apparattyq jıynda taǵy da sóz qozǵaldy.
«Bıyl oblystaǵy bilim berý uıymdaryna 112 jas maman keldi, - dedi bilim basqarmasynyń basshysy Dinıslam Bolathanuly. - Alaıda, úı berý máselesi burynǵydaı ózekti bolyp otyr. Ótken jyly aýyldyq mektepterdegi 335 mamannyń 33-i ǵana vedomstvolyq jáne jalǵa beriletin baspanaǵa qoly jetken. Qalǵandary bireýdiń úıinde nemese ata-anasymen turýda».
Pavlodar oblysynyń ákimi oryn alyp jatqan jaǵdaıdyń sebebin anyqtaýdy tapsyrdy. Óıtkeni, aýyldarda ekinshi naryqtaǵy úılermen másele joq. Al jas mamandarǵa arnaıy kóterme aqy tólenedi.
«Jaǵdaıdy saraptaýdan ótkizip, sońǵy eki jylda «Dıplommen aýylǵa» baǵdarlamasy arqyly kelgendermen jumys jasańyzdar, - dedi óńir basshysy. - Eger bul baǵdarlamaǵa bólgen resýrs jetpese, aıtyńyzdar. Eger ekinshi naryqtaǵy úıler joq bolsa, bizge jetkizińizder. Eger baspanamen kómektese almasańyzdar aýylǵa kadrlardy qalaı ornalastyrmaqsyzdar? Bul suraqty birinshi kezekte sheshý kerek. Olaı bolmaǵan jaǵdaıda jas maman bir jyldan keıin ketip qalady da, kóterme aqyny qalaı qaıtaratynyn bilmeı basy qatady».
Sonymen qatar, Bolat Baqaýov bos qalyp jatqan agrarlyq kolledjderdiń ǵırattary jóninde taǵy da qol astyndaǵylarynyń esine saldy.
«Ótken aptada Ýspen aýdanyndaǵy kolledjben ne bolyp jatqanyn kórdik, - dedi oblys ákimi. - Bul oqý mekemesi ǵımarttarynyń 30 paıyzy qoldanylmaıdy. Bul jerde shuǵyl amal qoldaný qajet. Qıratylsa eshkimge bere almaımyz. Sondyqtan ázirge ǵımarat bútin jáne jylý beriletin jaǵdaıda turǵanda kimge berý kerektigin oılańyzdar. Bul sol jerdegi ákimderge de baılanysty».
