Bolat Baqaýov ár oralman otbasynyń jaǵdaıymen tanysýǵa ýáde berdi
Búgin oblystyq ákimdikte ótken birikken alqa jıynynda aımaq basshysy bıyl arnaıy aýdandardan avtobýstarmen oralmandardy jetkizip, bólim basshylarymen birge kezdesetinin aıtty dep habarlaıdy pavlodarnews.kz .
Oblystyq jumyspen qamtý jáne áleýmettik baǵdarlamalar basqarmasynyń basshysy Qaırat Nurmaǵambetovtyń aıtýynsha, bıylǵy jyly Ertis óńirine kelgen 323 adam oralman mártebesin alǵan. Olar Pavlodar, Aqsý, Ekibastuz qalalaryna jáne Baıanaýyl, Pavlodar, Maı, Ýspen, Sharbaqty, Ertis, Lebıaji, Aqtoǵaı aýdandaryna qonystanǵan. Onyń ishinde eńbek etýge jaramdy 185 adamnyń 41-i turaqty jumyspen qamtylǵan. Ózdiginen tabys taýyp otyrǵandar - 112, bala kútimimen otyrǵandar - 14, jumyssyzdar sany - 18. Óńirlik kvotaǵa engizilgen 50 otbasyna memlekettik qoldaý kórsetilgen. Máselen, Ýspen aýdanyna qonystanǵan oralmandar 25-100 gektardan jer alýǵa nıet bildirgen. Degenmen olarǵa oralman mártebesin alǵannan keıin ǵana jer telimi jeke menshikke beriledi. Al, ázirge jalǵa alýǵa týra keledi.
- Budan basqa, ishki kóshi-qon boıynsha Ońtústik Qazaqstan, Mańǵystaý, Jambyl, Almaty jáne Qyzylorda oblystarynan qonys aýdarý júzege asyrylady, - dedi Qaırat Nurmaǵambetov. - Jyl basynan beri kóship kelgen 69 otbasynyń 68-i óńirlik kvotaǵa engizilgen. Qonys aýdarý boıynsha búginde Maı aýdany kvotany ıgermegen. Bıylǵy jyly jeti shańyraq kelgen bolsa, bir otbasy aýa raıy jaǵdaıyna baılanysty qaıtadan ketip qalǵan. Eki otbasy da kvotany tosyp, qarasha aıynda keri qaıtqan. Kelesi jyly qonys aýdarýshylardy qabyldaý kvotasy toǵyz ese artady. Oblys ákimi bul máselede qaǵazbastylyqqa jol bermeý kerektigin jáne qonys aýdarmas buryn qujattardy tolyq tekserip alý qajettigin eskertti. - Elbasy quryltaıda «qarsy alý úshin júrektiń jylýy kerek» dep aıtpady ma?, - dedi Bolat Baqaýov. - Bul másele osylaı sheshimin tapqanǵanǵa deıin olar basqa óńirge de kóship ketedi. Al, bizdiń óńirde aýyldyq aımaqtarda jumys kúshi tapshy. Kelesi jyly ýaqyt taýyp, mindetti túrde qandaı kómek kórsetilgenin qarap shyǵamyn. Jumyssyz, az qamtylǵan, qonys aýdarǵan otbasylardy jáne oralmandardy jumyspen qamtý boıynsha júıeli jumys júrgizý kerek».
